رۋسلان دالەنوۆ ۇلتتىق ەكونوميكا مينيسترلىگىنىڭ جاڭا مىندەتتەرىن اتادى
«ەكونوميكانىڭ جانە ءال- اۋقاتتىڭ ساپالى ءوسىمى - بۇل ءبىزدىڭ ناقتى ماقساتىمىز، ول ءۇشىن بىزدە بارلىق تەتىكتەر بار»، - دەپ توقتالدى ر. دالەنوۆ ۇكىمەت وتىرىسىنان كەيىن تىلشىلەرگە بەرگەن سۇحباتىندا.
سونىمەن قاتار مينيستر وڭىرلەردە جۇرگىزىلەتىن ماسەلەلەرگە ايرىقشا ءمان بەرىلەتىنىن اتاپ ءوتتى.
«بۇگىندە جەرگىلىكتى جەرلەردە حالىقتىڭ سۋعا، ينفراقۇرىلىمعا، بىلىمگە، دەنساۋلىق ساقتاۋ جانە باسقا دا سالالارعا ساپالى قولجەتىمدىگىن قامتاماسىز ءۇشىن ستاندارتتاردى ەنگىزۋ كەرەك. ءبىز وسى جۇمىستارمەن اينالىسامىز»، - دەدى ەربول دالەنوۆ.
بۇدان بولەك ۆەدومستۆو باسشىسى بيۋدجەتتىڭ كىرىس بولىگى بويىنشا پىكىر ءبىلدىردى.
«بۇل تۇرعىدا سالىق كودەكسىنە وزگەرىستەر بويىنشا جۇمىستاردى ىسكە اسىرامىز. وسى ورايدا «كولەڭكەلى» ەكونوميكا دەڭگەيىن تومەندەتۋگە تىرىسامىز. اتاپ ايتقاندا، ەڭبەكاقى تولەۋ قورىن كولەڭكەدەن شىعارۋ ءۇشىن ىنتالاندىرۋشى تەتىكتەردى ەنگىزەمىز. سونىمەن قاتار، ءار تەڭگە ءتيىمدى جۇمسالۋى ءۇشىن ستراتەگيالىق جوسپارلاۋدى بيۋدجەتپەن ۇشتاستىرامىز»، - دەدى مينيستر.
مۇنىمەن قوسا ول شاعىن جانە ورتا بيزنەستى دامىتۋ باعىتىنا دا توقتالدى.
«بيزنەستىڭ جول كارتاسى باعدارلاماسى جۇمىس ىستەپ تۇر. باعدارلاما اياسىندا ەكسپورتتى قولداۋ بويىنشا 500 ميلليارد تەڭگە بار. سونداي- اق قايتا وڭدەۋ سەكتورىن قولداۋ ءۇشىن 600 ميلليارد تەڭگە ەسكەرىلگەن. بۇل تۇرعىدا قارجىنى ەكونوميكاعا تەز ءارى ءتيىمدى وتكىزۋ ءۇشىن جۇمىستى ۇيلەستىرەمىز»، - دەدى مينيستر.
رۋسلان دالەنوۆ ەكونوميكالىق ءوسىم ارقاسىندا ءال- اۋقاتتىڭ ارتۋىن حالىق سەزىنۋى ءۇشىن مينيسترلىك بارلىق كۇش- جىگەرىن سالاتىنىن ايتتى.
«بيىل ەكونوميكالىق ءوسىمدى قامتاماسىز ەتەمىز. اعىمداعى جىلى سالانىڭ دامۋى كورسەتكىشتەرىن بايقايتىن بولاسىزدار»، - دەدى ول.
اۆتور: رۋسلان عابباسوۆ