سەناتورلار قازاقستاننىڭ قورعانىس سالاسىنداعى الدىڭعى قاتارلى كاسىپورىنداردا بولدى

 سەناتورلار الدىمەن بروندى تەحنيكا شىعاراتىن «قازاقستان پاراماۋنت ينجينيرينگ» ماشينا جاساۋ كاسىپورنىنا بارىپ، قازىرگى زامانعى كۇردەلى تەحنيكانىڭ سىرتقى «بروندالعان قاباتىنىڭ» قۇرىلىسىنان باستاپ دايىن ونىمگە دەيىنگى ءوندىرىس بارىسىمەن تانىستى. سونداي- اق كاسىپورىننىڭ جوعارى تەحنولوگيالىق مۇمكىندىكتەرى، ونىڭ ىشىندە شىعارىلاتىن ءاربىر ماشينانى كەز- كەلگەن تاپسىرىس بەرۋشىنىڭ تالاپتارىنا بەيىمدەي الاتىن كونسترۋكتورلىق بيۋرونىڭ جۇمىسىن كوردى.

«قازاقستان پاراماۋنت ينجينيرينگ» مەكەمەسىنىڭ باس ديرەكتورى ەربول سالىموۆتىڭ ايتۋىنشا، كومپانيا وتاندىق ساتىپ الۋشىلار قوياتىن تالاپتار ارتا تۇسسە دە ونىمدەر قۇنىن تومەندەتۋمەن قاتار، قازاقستاندى قورعانىس سالاسىنداعى حالىقارالىق نارىعىنا لايىقتى تۇردە پاش ەتۋ ءۇشىن ءوندىرىس پەن تەحنولوگيالىق جەلىنى كەڭەيتىپ وتىر.

«الەمدە قانشا مەملەكەت بولسا دا سولاردىڭ بارلىعى بىردەي ءوزىن قارۋ- جاراقپەن، وق- دارىمەن قامتاماسىز ەتە المايدى. وعان ءبىراز مەملەكەت قانا قابىلەتتى. سوندىقتان تاۋەلسىزدىك العاننان كەيىن باس اسكەري قولباسشىمىز وتاندىق اسكەري كاسىپكە ايرىقشا كوڭىل ءبولىپ كەلەدى. سونىڭ ناتيجەسىندە ەلىمىزدە بىرنەشە زاۋىت اشىلىپ، جۇمىس ىستەپ جاتىر. ەندىگى ماقسات قازاقستاندىق قامتۋدىڭ كولەمىن ارتتىرىپ، ءتىپتى بولشەكتەردى دە وزىمىزدە شىعارۋىمىز قاجەت. وسى باعىتتا جاقسى جۇمىس جۇرگىزىلۋدە»، - دەدى زاۋىتتى ارالاۋ بارىسىندا ب ا ق وكىلدەرىنە سۇحبات بەرگەن سەناتور نۇرجان نۇرسيپاتوۆ.

ايتا كەتەيىك، 2015 -جىلعى 20 - قاراشادا ەلباسى اشقان زاۋىت مينادان قورعانىسى كۇشەيتىلگەن بروندى دوڭگەلەكتى ماشينا جاساۋدىڭ جاڭا تەحنولوگياسى بويىنشا اسكەر مەن ارناۋلى بولىمشەلەرگە ارنالعان ماشينا شىعارادى. ولاردىڭ استى 10 كەلى تروتيل جارىلعىشى مولشەرىندەگى جارىلىسقا شىدايتىن بالليستيكالىق جوعارى قورعانىسقا يە ءارى تاسادان جاسالعان شابۋىلدارعا توتەپ بەرە الادى.

زاۋىت جۇمىسى باستالعاننان بەرى تاپسىرىس بەرۋشىلەرگە ارناپ 4x4 دوڭگەلەكتى بروندالعان «ارلان» جانە «الان» ماشينالارىن شىعارۋ جولعا قويىلدى. 2018 -جىلدىڭ سوڭىندا قورعانىس مينيسترلىگىنە ارنالعان «بارىس» 6х6 دوڭگەلەكتى برونەترانسپورتەرى سىناقتان ءوتتى. قازىرگى ۋاقىتتا زاۋىت ۇڭعىسى 30 م م بولاتىن وتاندىق «اڭسار» زەڭبىرەگىمەن قوسارلانعان 7,62 ۇڭعىلى قاشىقتان باسقارىلاتىن پۋلەمەت قوندىرىلعان  8x8 دوڭگەلەكتى «بارىس» برونەترانسپورتەرىن سىناقتان وتكىزۋگە كىرىسكەن.

سەناتورلار سونداي- اق «قازاقستان اسەلسان ينجينيرينگ» مەكەمەسىندە دە بولدى. بۇل كومپانيا تۇندە جانە كۇندىز كورسەتە الاتىن، جىلۋ شىعاراتىن زاتتاردى كورەتىن، بارلاۋ اسپاپتارى مەن كاسىبي بايلانىس قۇرالدارىن وندىرۋگە جانە ساتۋعا ماماندانعان. ەلىمىزدىڭ قارۋلى كۇشتەرى مەن باسقا دا الەۋەتتى قۇرىلىمدار كاسىپورىننىڭ نەگىزگى تاپسىرىس بەرۋشىلەرى جانە كومپانيا ءونىمى قۇرامىنىڭ 58 پايىزى قازاقستاندىق بولىپ تابىلادى. 2017 -جىلى تۇركيا مەن وزبەكستانعا ەكسپورتتىق كەلىسىم جاسالدى. ەندى ت م د ەلدەرى مەن شەتەلگە دە ءونىم شىعارۋ جوسپارلانىپ وتىر.

اۆتور: مارلان جيەمباي