پرەزيدەنت جارلىعىمەن اقمولا وبلىسىندا جاڭا سۋديالار تاعايىندالدى

بۇل تۋرالى وڭىرلىك سوتتىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.

پرەزيدەنت جارلىعىمەن زەرەندى اۋداندىق سوتىنا ايدا كارىموۆا، كوكشەتاۋ قالالىق سوتىنا روزا ءجانادىلوۆا جانە ءبىرجان سال اۋداندىق سوتىنا الىبەك ورازوۆا سۋديا قىزمەتىنە تاعايىندالدى.

ورازوۆ الىبەك اقمولا وبلىسىنىڭ سوت جۇيەسىندە جەرگىلىكتى سوتتاردىڭ كەڭسە مەڭگەرۋشىسى لاۋازىمىندا 7 جىل ەڭبەك ەتكەن. ايدا كارىموۆا اقمولا وبلىسى سوتتارىنىڭ كەڭسەسىندە 10 جىل قىزمەت اتقارعان. روزا ءجانادىلوۆا سوت جۇيەسىندە 15 جىل ەڭبەك ەتىپ، ونىڭ ىشىندە قاراعاندى وبلىسى بويىنشا سوتتار اكىمشىسىندە - 9 جىل، ق ر جوعارعى سوتىنىڭ جانىنداعى سوتتاردىڭ قىزمەتىن قامتاماسىز ەتۋ دەپارتامەنتىندە 6 جىل ساراپشى جانە باس كەڭەسشى لاۋازىمدارىن اتقارعان»، - دەپ اتاپ ءوتتى باسپا ءسوز قىزمەتىنەن.

انت بەرۋ ءراسىمى بارىسىندا دوسجان ءامىروۆ تاعايىندالعان سۋديالاردى قۇتتىقتاي وتىرىپ، سوت جۇيەسىندە تابىستى قىزمەت اتقارۋعا، زاڭ ۇستەمدىگى مەن ادىلدىكتى قامتاماسىز ەتۋگە، ونىڭ دامۋىنا ۇلەس قوسۋعا جانە قابىلدانعان انتتارىنا ادال بولۋعا شاقىردى.

جاڭا تاعايىندالعان سۋديالار، سونداي-اق زەرەندى، ءبىرجان سال اۋداندىق جانە كوكشەتاۋ قالالىق سوتتارىنىڭ ۇجىمدارىنا تانىستىرىلدى.