جاقسىلىق جاسا: باتىسقازاقستاندىق كاسىپكەر كوپبالالى وتباسىعا پاتەر كىلتىن تابىس ەتتى
ورال. قازاقپارات - ورالدا بۇگىن كوپبالالى وتباسىعا پاتەر كىلتى تابىس ەتىلدى، دەپ حابارلايدى قازاقپارات ءتىلشىسى.
«مەيىرىمدى كوكتەم» جوباسى اياسىندا «قاز- حول» ج ش س باسشىسى تيمۋر ءامين جەتى بالانىڭ اناسى مانار بۇركىتوۆاعا ءۇش بولمەلى پاتەردىڭ كىلتىن تاپسىردى.
اتالمىش پاتەر قۇرمانعازى كوشەسى 198-مەكەنجايىندا 22 - اقپان كۇنى پايدالانۋعا بەرىلگەن توعىز قاباتتى ۇيدە ورنالاسقان. اپاتتى جاعدايداعى قوس قاباتتى ءۇيدىڭ ورنىندا مەملەكەتتىك - جەكەشەلىك ارىپتەستىك اياسىندا تۇرعىزىلعان جاڭا ۇيدە بارلىق جاعداي جاسالعان.
كوپبالالى وتباسىعا سىيلانعان ءۇش بولمەلى پاتەردىڭ اۋماعى - 90 شارشى مەتر. گاز، سۋ، ەلەكتر جۇيەسىمەن قامتاماسىز ەتىلگەن.
وسىنداي توسىن سىي ءۇشىن مانار بۇركىتوۆا قۋانىشتارىنىڭ شەكسىز ەكەندىگىن جەتكىزدى.
ونىڭ سوزىنە قاراعاندا، ەرى ەرجانمەن بىرگە جەتى بالانى تاربيەلەپ وتىر. ون التى جىلدان بەرى پاتەر جالداپ كەلە جاتقان وتباسىندا ە. بۇركىتوۆ قانا جۇمىس جاسايدى. ءۇش ۇل، ءتورت قىزدىڭ التاۋى قالاداعى №46 مەكتەپتە ءبىلىم الادى. ۇلكەن قىزى 16, كىشى ۇلى 3 جاستا. مانار كەڭەس قىزى ءمۇعالىم بولعانىمەن، ەكىنشى توپ مۇگەدەگى بولىپ تانىلعان قىزىنىڭ كۇتىمىمەن ۇيدە وتىر.
ايتا كەتەيىك، «قاز- حول» كومپانياسى 2006 -جىلى قۇرىلعان. سودان بەرى ورال قالاسىندا ەلۋدەن استام ءۇيدى سالعان.
كوپبالالى وتباسىلارعا، مۇمكىندىگى شەكتەۋلى جانە باسقا مۇقتاج جاندارعا قولۇشىن سوزۋ ماقساتىندا وڭىردە باستاۋ العان «مەيىرىمدى كوكتەم» جوباسى اياسىنداعى جۇمىستار بۇدان كەيىن دە جالعاسىن تابادى.