وزبەكستان بيلىگى بولە- جيەندەردىڭ ۇيلەنۋىنە تىيىم سالماق
استانا. قازاقپارات - وزبەكستان بيلىگى بولە- جيەندەردىڭ تۇرمىس قۇرۋىنا تىيىم سالعالى جاتىر. بۇل تۋرالى Podrobno.uz سايتى دەنساۋلىق ساقتاۋ مينيسترلىگىنىڭ زاڭ جوباسىنا سىلتەمە جاساپ حابارلادى.
قۇجاتقا قاراعاندا، وتباسى كودەكسىندەگى ەر مەن ايەلدىڭ تۇرمىس قۇرۋىنا تىيىم سالىناتىن جاعدايلار جازىلعان 16-بابىنا وزگەرىس ەنگىزىلەدى.
وزبەكستاندا ەردىڭ نە ايەلدىڭ پسيحيكالىق اۋىتقۋشىلىعى بولسا نە باسقا نەكەدە بولسا شاڭىراق كوتەرۋىنە تىيىم سالىنادى. سونداي- اق ءبىر اكە- شەشەدەن تاراعان، اكەسى نە شەشەسى ورتاق تۋىستاردىڭ، اسىراپ العان بالالاردىڭ اسىراۋشىسىمەن تۇرمىس قۇرۋىنا بولمايدى.
جاڭا زاڭ بولە- جيەندەردىڭ ۇيلەنۋىنە تىيىم سالۋدى دا كوزدەيدى.
وزبەكستان زاڭناماسى بويىنشا، ەرلەرگە - 18، قىزدارعا 17 جاستان باستاپ نەكەدە تۇرۋعا رۇقسات بەرىلەدى.
الايدا جۇكتىلىك، بالانىڭ تۋۋى سياقتى ناقتى سەبەپ بولعان جاعدايدا اۋدان نە قالا حوكيمى (باسشىسى) جۇپتىڭ ءوتىنىشى بويىنشا نەكە جاسىن ءبىر جىلدان كوپ ەمەس ۋاقىتقا تومەندەتە الادى.