تۇركىستان وبلىسىندا ازىق- تۇلىكتى تەگىن تاراتاتىن دۇكەندەر جۇمىس ىستەيدى
وبلىستاعى تۇلكىباس، تولەبي جانە كەلەس اۋداندارىندا الەۋمەتتىك دۇكەندەر اشىلىپ، جۇمىس ىستەۋدە، دەپ حابارلايدى قازاقپارات ءتىلشىسى.
مەملەكەت باسشىسى نۇرسۇلتان نازاربايەۆ كەزەكتى جولداۋىندا باعا ماسەلەسىن ءوزى باقىلاۋعا الاتىنىن ايتقان بولاتىن. «بۇل ماڭىزدى ماسەلە. باعانىڭ وسۋىنە ەشقانداي دا جول بەرمەۋ كەرەك. اسىرەسە، قازاقستاندا ءوندىرىلىپ جاتقان ازىق- تۇلىك تاۋارلارىنا باعا وسپەۋى ءتيىس»، - دەدى ەلباسى.
وسىعان وراي، تۇركىستان وبلىسىندا ءبىرقاتار جۇيەلى جۇمىستار اتقارىلۋدا. ماسەلەن، قازىرگى تاڭدا تۇلكىباس اۋدانىندا 6 الەۋمەتتىك دۇكەن جۇمىس ىستەيدى. ولار حالىق كوپ شوعىرلانعان تۇلكىباس، ساستوبە، بالىقتى، جاباعىلى، جاسكەشۋ جانە اۋدان ورتالىعى ت. رىسقۇلوۆ اۋىلدارىندا ورنالاسقان.
اشىلعانىنا ءبىر جىلدان استام ۋاقىت وتكەن دۇكەندەردە حالىقتىڭ از قامتاماسىز ەتىلگەن توپتارىنا ازىق- تۇلىك نارىقتاعى باعادان 15-20 پايىزعا ارزان ساتىلۋدا. الەۋمەتتىك دۇكەندەرگە اۋىلدىق وكرۋگ اكىمدىكتەرى ەلدىمەكەندەردەگى از قامتاماسىز ەتىلگەن جانۇيالاردىڭ ءتىزىمىن وتكىزىپ، سول تىزىمدەگى ازاماتتار جەكە كۋالىگىمەن ازىق- تۇلىكتى ارزانداتىلعان باعامەن الا الادى. ءارى كاسىپكەرلەرگە قولايلى جاعدايلار جاسالىپ وتىر. ءدال وسىنداي دۇكەن تولەبي اۋدانى كوكسايەك ەلدىمەكەنىندە دە ىسكە قوسىلدى.
الەۋمەتتىك جاعىنان وسال وتباسىلارعا ارنالىپ اشىلعان دۇكەندە دەمەۋشىلەر ەسەبىنەن مۇقتاجدارعا ازىق- تۇلىك، كيىم- كەشەك تاعى دا باسقا تۇرمىستىق زاتتار تەگىن بەرىلۋدە. لەنگىر قالاسىنداعى دوستىق ەلدىمەكەنىندەگى «نۇر- جانار» دۇكەندەرىنەن كوپبالالى انالار مەن تۇرمىستىق جاعدايى تومەن جانۇيالار كەز كەلگەن قاجەتتى تۇرمىستىق تاۋارلار مەن كيىم- كەشەكتەردى تەگىن الا الادى. سول سياقتى كەلەس اۋدانىنىڭ ۇشقىن اۋىلدىق وكرۋگىندە الەۋمەتتىك دۇكەن جەرگىلىكتى تۇرعىنداردىڭ قاجەتىنە جاراۋدا. بۇگىنگى تاڭدا اتالعان دۇكەننەن كوپبالالى جانە الەۋمەتتىك تۇرمىس جاعدايى تومەن 22 وتباسى ءتيىستى كومەكتەرىن الۋدا. كەز كەلگەن تاماق ونىمدەرى مەن كيىمدەر اقىسىز بەرىلۋدە.