كينودا كورسەتىلەتىن كوپ اقشا قايدا جاسالادى؟

«قازاقپارات» ح ا ا ادەتتەگىدەي وقىرمان نازارىنا الەمدىك اقپارات كوزدەرىنە شولۋىن ۇسىنادى.

ا ق ش پەن ۇلى بريتانيانىڭ ۇستەمدىگى ازايىپ بارادى - Bloomberg

بىرنەشە ونجىلدىقتا ۇلى بريتانيا مەن ا ق ش بۇكىل الەم بويىنشا ساياسي ۇستەمدىككە يە بولىپ كەلدى. دەگەنمەن، Bloomberg باسىلىمىنىڭ جازۋىنشا، بۇگىنگى تاڭدا انگلوسفەرا ءوزىنىڭ بەدەلىنەن ايىرىلىپ جاتقان كورىنەدى.

ماقالا اۆتورىنىڭ ايتۋىنشا، دونالد ترامپ كونگرەسپەن ا ق ش- تىڭ وڭتۇستىگىندەگى توتەنشە جاعداي بويىنشا كەلىسە الماي جاتىر. ال ۇلى بريتانيا بيلىگىنىڭ برەكسيتپەن باسى قاتىپ ءجۇر.

«ا ق ش پەن ۇلى بريتانيا اشىق نارىعى، جاھاندانۋ جەتىستىكتەرى، بوستاندىق ماسەلەلەرى بويىنشا كوپ مەملەكەتتەردەن الدا كەلە جاتىر ەدى. الايدا ولار تانىمالدىعىنان دا ايىرىلىپ جاتىر. امەريكا مەن ۇلىبريتانيانىڭ الەمدىك ارەناداعى الاتىن ورىندارى ويسىراپ قالۋى مۇمكىن. سونىمەن قاتار، ازاماتتاردىڭ ەركىندىگى، ەكونوميكاعا پايدا اكەلەتىن ەركىن ساۋداسى دا باسەڭدەپ بارادى. ارينە، انگلوسفەرا ۇسىنعان يدەيالار كوپتەگەن ادامدارعا كەدەيلىكتەن شىعۋعا كومەكتەستى. اقش پەن ۇلىبريتانيا ءالى دە تەحنولوگيا، قارجى، ءبىلىم بەرۋ سالالارىندا الدا كەلە جاتىر. سوندىقتان بۇل ەكى مەملەكەت ءوز كۇشتەرىن جيناپ، قايتا قالىپقا كەلۋگە تىرىسۋلارى قاجەت» ، - دەپ جازادى اۆتور.

2022 -جىلى سەۋلدە روبوتوتەحنيكا مۋزەيى اشىلادى - World Architecture

ءۇش جىلدان كەيىن سەۋلدە روبوت عىلىمىنا ارنالعان مۋزەي رەسمي تۇردە اشىلادى. World Architecture باسىلىمىنىڭ جازۋىنشا، مۋزەيدىڭ جوباسىنا دا، قۇرىلىسىنا دا روبوتتار جاۋاپ بەرەتىن بولادى.

 « Melike Altinisik Architects (MAA) فيرماسى روبوتتارعا ارنالعان مۋزەي بويىنشا حالىقارالىق كونكۋرستا جەڭىسكە جەتكەنىن حابارلادى. بۇل مۋزەي سەۋلدەگى Metropolitan Museum فيليالىنا اينالادى. كومپانيا وكىلدەرىنىڭ ايتۋىنشا، مۋزەي جوباسى، ماتەريالدار ءوندىرىسى مەن وبەكتىنىڭ قۇرىلىسىنا روبوتتار قاتىساتىن بولادى»، - دەپ جازادى باسىلىم.

اۆتوردىڭ ايتۋىنشا، جاڭا مۋزەي 2500 شارشى مەتر جەردى الاتىن بولادى.

 «مۋزەيگە روبوتوتەحنيكا جەتىستىكتەرىمەن قوسا جاساندى ينتەللەكت جۇيەسى بار ەكسپوناتتار قويىلادى. قۇرىلىس 2020 -جىلى باستالادى. مۋزەي 2022 -جىلى اشىلادى. ماماندار مۋزەي قۇرىلىسىنا روبوتتاردى جۇكتەۋ ۋاقىتتى دا، اقشانى دا ۇنەمدەيتىنىن ايتۋدا»، - دەيدى اۆتور.

جاساندى ينتەللەكت ونەر تۋىندىسىن جاساي المايدى - Technology Review

سوڭعى كەزدەرى جاساندى ينتەللەكت جۇيەسى بار روبوتتار سۋرەتتەر سالىپ باسەكەگە تۇسۋدە. سونداي جۇمىستاردىڭ ءبىرى 2018 -جىلى جەلتوقساندا اۋكسيونداردىڭ بىرىندە جارتى ميلليون دوللارعا ساتىلعانى بەلگىلى. دەگەنمەن، Technology Review باسىلىمىنىڭ جازۋىنشا، مۇنداي ونەر تەك ادامعا عانا ءتان جانە ونى ەشبىر جاساندى ينتەللەكت مەڭگەرە المايدى.

«گارۆارد ۋنيۆەرسيتەتىنىڭ فيلوسوفيا پروفەسسورى شون دوررەنس كەللي جاساندى ينتەللەكت باح كانتاتاسىن جاقسى مەڭگەرە السا دا، ەشقاشان ادامنان اسىپ ءتۇسىپ، كرەاتيۆتى اگەنتكە اينالا المايتىنىن ايتتى»، - دەپ جازادى باسىلىم.

 اۆتوردىڭ ايتۋىنشا، ونەر تەك ادامزاتقا عانا ءتان. ال تەحنولوگيالار دامىعان سايىن ءبىز ونەردى دۇرىس باعالامايتىن بولعانبىز.

«ونەردى مەڭگەرۋ ءۇشىن روبوتتار ادامنىڭ ىقپالىنسىز وزدەرى ويلاپ ۇيرەنۋلەرى كەرەك. ال بۇل جاقىن ارادا بولا قويمايدى»، - دەپ ايتىپتى گارۆارد پروفەسسورى.

جەر بەتىندە بەيبىتشىلىكتى قالاي ورناتۋعا بولادى؟ - بي-بي-سي

بي-بي-سي باسىلىمىنىڭ جازۋىنشا، جاساندى ينتەللەكت پلانەتامىزدا بەيبىت ءومىر ورناتۋعا كومەكتەسە الادى.

«قاي جەردەگى شيەلەنىستىڭ سوڭى سوعىسقا ۇلاسىپ، قاي تۇكپىردەگى ازىق تۇلىك جەتىسپەۋشىلىگى اشتىققا اپاراتىنىن بولجاۋ بۇكىل الەم بويىنشا بەيبىت ءومىر ورناتۋعا كومەكتەسە الادى. ياعني، بۇل بولجامدار گۋمانيتارلىق داعدارىستىڭ الدىن الىپ، دەر كەزىندە كومەك كورسەتۋگە اسەر ەتەتىن بولادى»، - دەپ جازادى باسىلىم.

ب ۇ ۇ مالىمەتتەرىنە سەنسەك، 2017 -جىلى 68,5 ميلليون ادام اشتىق، سوعىس پەن تابيعي اپاتتار سالدارىنان ءوز ۇيلەرىن تاستاپ كەتۋگە ءماجبۇر بولعان. بۇل ءار كۇن سايىن شامامەن  44000 ادام تۇرعىن جايلارىن تاستاپ كەتەدى.

«ساياسي، ەتنيكالىق نەمەسە ءدىني شيەلەنىستەردىڭ ۋشىعۋىن الدىن الا بولجاۋ قيىن. دەگەنمەن، عالىمدار مۇنداي كۇردەلى اقپاراتتاردى ساراپتاۋعا جاساندى ينتەللەكت كومەكتەسە الاتىنىنا سەنىمدى»، - دەپ جازادى اۆتور.

كينوداعى كوپ اقشا قايدان الىنادى؟ - CNN

كينوداعى كوپ اقشا كورەرمەنگە بارىنشا شىنايى كورىنەدى. CNN باسىلىمىنىڭ جازۋىنشا، ونىڭ وزىندىك سىرى بار.

«اتلانتاداعى RJR Props كومپانياسى كينو تۇسىرىلىمىندە قولدانىلاتىن جالعان اقشا شىعارۋمەن اينالىسادى. ونىڭ ايتۋىنشا جالعان اقشا شىعارۋ زاڭ جۇزىندە جۇرگىزىلۋى كەرەك ەكەن. ولاي بولماعان جاعدايدا كەز كەلگەن ءتۇسىرىلىم توقتاتىلىپ، فيلم جارامسىز سانالادى»، - دەپ جازادى باسىلىم.

«ا ق ش- تا جالعان اقشا فەدەرالدى زاڭعا سايكەس بولۋى كەرەك. سونىمەن قاتار، كينوعا ارنالعان اقشانى شىن بانكنوتتاردىڭ ديزاينىن وزگەرتپەي جاساۋ مىندەت سانالادى»، - دەپ جازادى باسىلىم. اۆتوردىڭ ايتۋىنشا، بۇل كومپانيا كينو تۇسىرىمدەرىنە اقشا شىعاراتىن الەمدەگى جالعىز كومپانيا.

 «كينوعا ارناپ جالعان اقشا شىعارۋ وتە كوپ شىعىندى قاجەت ەتەدى. ءبىر بۋما اقشانىڭ باعاسى 45 دوللاردان 65 دوللار اراسىندا بولادى. ءبىر بۋماعا ءجۇز بانكنوت بار»، دەيدى كومپانيا يەسى راپپور.

اۆتور: ايكۇمىس بولاتبەك