اتى اڭىزعا اينالعان بەكزات ساتتارحانوۆ تۋرالى سەريال ءتۇسىرىلىپ جاتىر

 استانا. قازاقپارات - «حابار» اگەنتتىگى سيدنەي وليمپياداسىنىڭ چەمپيونى مارقۇم بەكزات ساتتارحانوۆ تۋرالى كوركەم فيلم ءتۇسىرىپ جاتىر.

ءتۇسىرىلىم جۇمىستارى تۇركىستان، الماتى جانە ىستامبۇل قالالارىندا وتۋدە. بۇگىنگى تاڭدا كارتينانىڭ جەتپىس پايىزى دايىن.

اگەنتتىك باسشىلىعىنىڭ ايتۋىنشا اۆتوبيوگرافيالىق دراما كۇز ايلارىندا كورەرمەنگە جول تارتادى. تۋىندىنىڭ رەجيسسەرى - مۇرات بيدوسوۆ.

تەلەحيكايادا اققان جۇلدىزداي جارق ەتىپ، از عانا عۇمىر كەشكەن سپورتشىنىڭ ءومىرى مەن سپورتتاعى جەتىستىگى سۋرەتتەلەدى. تەلەحيكايانىڭ سيۋجەتتىك جەلىسىندە بەكزات ساتتارحانوۆ ءومىرىنىڭ ءۇش كەزەڭى قامتىلادى. بالالىق شاعى، بوز بالا كەزەڭى جانە ءومىرىنىڭ سوڭعى ءساتى. 90-جىلداردىڭ باسىنداعى قيىن-قىستاۋ كەزەڭگە تاپ كەلگەن بەكزاتتىڭ بالالىعى كوپ قيىندىقتارمەن وتەدى. تۇركىستان قالاسىنداعى تەمىر جولدى بويلاي ورنالاسقان شاعىن اۋىلدىڭ قاراپايىم تىرشىلىگى بالا بەكزاتتىڭ كوزىمەن بەينەلەنەدى. ونىڭ ارمانى، نامىسقوي ءبىتىمى ءار ءبىر ساتتە سىنالىپ وتىرادى.

بىردە اتا-اناسى بەكزاتتى كۇرەسكە قاتىسسىن دەپ باپكەرگە اپارادى. وندا بەكزات ءوزىنىڭ سەرگەكتىگىمەن كوزگە تۇسەدى. دەگەنمەن كۇرەسكە قاتىسقان بالانىڭ بويى وسپەي قالادى دەگەن تۇسىنىكپەن ونى بوكسقا اۋىستىرادى. باپكەرىمەن تانىسقان كۇننەن باستاپ، بۇل سپورت تۇرىنە ەرەكشە ماحابباتى اشىلادى.

كۇن سايىن ەرىنبەي جاتتىعىپ، العاش رەت تۇركىستاندا وتكەن سايىستا جارقىراپ كورىنەدى. بوز بالا شاعىندا گەرمانيادا وتكەن تۋرنيردە توپ جارىپ، باپكەرلەر وليمپياداعا دايارلاۋ جاتتىعۋلارىنا قابىلدايدى. 1999-جىلى تاشكەنتتە وتكەن بۇكىل ازيا بىرىنشىلىگىندە كۇمىس جۇلدەگە يە بولىپ، وليمپيادا ويىندارىنا جولداما الادى. سولاي 2000-جىلى سيدنەيدە تارتىستى ويىندار وتكىزىپ، التىن مەدالعا يە بولادى.

«بۇل بۇكىل ءومىرى ەمەس، ومىرىندەگى ءبىر كەزەڭ. بوكسقا قالاي كەلدى، ومىرىندە قانداي قىزىق وقيعالار بولدى. بۇل جوباداعى ەڭ باستىسى - سيدنەيدەگى وقيعا. كارتينادا وسى ماسەلەلەر كوتەرىلەدى»، - دەيدى رەجيسسەرى مۇرات بيدوسوۆ.

كەيىپكەرلەردى تاڭداعاندا تەك اكتەرلىك شەبەرلىگى ەمەس، سپورتتىق دايىندىعى دا ەسكەرىلگەن. ماسەلەن، باستى ءرول بەكزاتتى جاس اكتەر سامات ءازىمقۇلوۆ وينايدى. ول 2006-2007-جىلدارى كيكبوكستان جاستار اراسىندا ەكى رەت قازاقستان چەمپيونى بولعان.

«بۇل ءبىر ادامنىڭ ءومىرى، ءبىر ادامنىڭ تاعدىرى. جالپى، وسى فيلم ارقىلى بەكزات اعامىزدى قايتا ءتىرىلتىپ، ارتىمىزدان ءوسىپ كەلە جاتقان جاستاردىڭ سپورتقا دەگەن، بوكسقا دەگەن قۇلشىنىسىن ارتتىرساق جانە جۇرەكتەرىنە كىشكەنە دە بولسىن ءبىر پاتريوتتىق سەزىم ۇيالاتساق، وندا ول ءبىزدىڭ ارمانىمىزدىڭ ورىندالعانى دەپ بىلەمىن»، - دەيدى اكتەر سامات ءازىمقۇلوۆ.

سونىمەن قاتار التى ءبولىمدى تەلەحيكايادان عالىمبەك وسپانوۆ، مۇرات جارىلقاسىنوۆ، مايرا ماقۇلبەكوۆا، دۋلىعا اقمولدا، قۋانىش مۇقاتاي، باقداۋلەت شايماحان جانە باسقا اكتەرلەردى كورەسىزدەر.