قازاقستان مەن بەلارۋس اسكەري تەحنيكانى جاساۋدا عىلىمي زەرتتەۋلەر جۇرگىزەدى

استانا. قازاقپارات - پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «قازاقستان ۇكىمەتى مەن بەلارۋس ۇكىمەتى اراسىنداعى ونەركاسىپتىڭ قورعانىس سالالارى ۇيىمدارىنىڭ وندىرىستىك جانە عىلىمي- تەحنيكالىق كووپەراتسياسى تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالدى، دەپ حابارلايدى قازاقپارات ءتىلشىسى.

 «وسى كەلىسىم ەكى ەلدىڭ قورعانىس ونەركاسىبى سالاسىنداعى كاسىپورىنداردىڭ ءوزارا ىنتىماقتاستىعى ءۇشىن قولايلى جاعدايلار جاساۋدى كوزدەيدى. ءبىرىنشى كەزەكتە اسكەري- تەحنيكالىق ماقساتتاردا جەتكىزىلەتىن ونىمدەر مەن كورسەتىلەتىن قىزمەتتەر ليسەنزيالاۋدان بوساتىلادى. بۇل ولاردىڭ جەتكىزۋ مەرزىمىن ەداۋىر قىسقارتادى»، - دەدى ق ر قورعانىس جانە اەروعارىش ونەركاسىبى ۆيتسە- ءمينيسترى امانياز ەرجانوۆ.

كەلىسىم اياسىندا قازاقستان ءۇشىن ءبىرقاتار پايدالى قادامدار ىسكە اسىرىلماق. بىرىنشىدەن، اسكەري ماقساتتاعى ونىمدەردى جەتىلدىرۋگە جاردەمدەسەتىن جيىنتىقتاۋىش ماتەريالداردى ءوزارا جەتكىزۋ ارقىلى اسكەري ءونىمنىڭ ءوندىرىسىن ارتتىرۋعا ىقپال ەتەدى. ەكىشىدەن، قورعانىس ونەركاسىبى كاسىپورىندار ءوزارا تاجىريبە الماسا الادى جانە وسى سالادا وتە پايدالى ءارى ءتيىمدى تاجىريبەنى قولدانۋىنا مۇمىكىندىك تۋادى.

ۇشىنشىدەن، قارۋ- جاراق پەن اسكەري تەحنيكانىڭ جاڭا ءتۇرىن جاساۋ، سونداي- اق قولدا بار تەحنيكانى جاڭارتۋ ماقساتىندا بىرلەسكەن عىلىمي زەرتتەۋلەر جۇرگىزە الادى.

«كەلىسىمدى راتيفيكاتسيالاۋ بيۋدجەتتەن قوسىمشا شىعىنداردى تالاپ ەتپەيدى جانە تەرىس الەۋمەتتىك سالدارعا اكەلىپ سوقپايدى»، - دەدى ا. ەرجانوۆ.

 بەلگىلى بولعانداي، ەلىمىز مەملەكەتتىك قورعانىس تاپسىرىسى اياسىندا بەلارۋستەن تىكەلەي اسكەري تەحنيكا ساتىپ الىپ جاتقان جوق. الايدا بروندى تەحنيكانى، اۆياتسيالىق تەحنيكانى جوندەۋ شارالارى ەسكەرىلگەن. قازاقستان ءوز كەزەگىندە زەڭبىرەك پەن وعان بايلانىستى ونىمدەر جەتكىزەدى.

اۆتور: رۋسلان عابباسوۆ