ءتورت پايىزدىق اۆتونەسيە: ۇكىمەت قوسىمشا قارجى ءبولدى
ق ر يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەكتىڭ ايتۋىنشا، بيىل باعدارلاما اياسىندا قوسىمشا 10 ميلليارد تەڭگە بولىنەدى. سونىڭ 8 ميللياردى جەڭىل كولىكتەردى نەسيەلەۋگە باعىتتالسا، 2 ميلليارد تەڭگەسى كوممەرتسيالىق تەحنيكانى ليزينگتىك قارجىلاندىرۋعا جۇمسالادى.
«العاشقى كەزەڭدە 2 مىڭنان استام اۆتوموبيل ساتىلادى دەگەن جوسپار بار. كەلەسى جىلدارى ريەۆولۆەرلىك قاراجات ەسەبىنەن جىلىنا ورتاشا ەسەپپەن 400-500 وتاندىق اۆتوموبيل ساتىلاتىن بولادى»، - دەدى ج. قاسىمبەك ۇكىمەتتىڭ بۇگىنگى وتىرىسىندا.
ونىڭ سوزىنە قاراعاندا، 4 پايىزدىق اۆتونەسيە باعدارلاماسى وسىدان ءتورت جىل بۇرىن قولعا الىنعان بولاتىن. سودان بەرى بيۋدجەتتەن 40 ميلليارد تەڭگە ءبولىندى. سونىڭ ارقاسىندا 13245 وتاندىق اۆتوكولىك جەڭىل كرەديتپەن ساتىلىپ، 747 كوممەرتسيالىق تەحنيكا ليزينگكە بەرىلدى.
ايتا كەتەيىك، بۇعان دەيىن قازاقپارات ءتىلشىسى اۆتوسالوندارعا حابارلاسىپ، 4 پايىزدىق اۆتونەسيەنىڭ قاي كەزدە باستالاتىنىن سۇراعان بولاتىن. بانك قىزمەتكەرلەرى نەسيەنىڭ ارتىق تولەمىن دە ەسەپتەپ بەردى. رەداكسيا اتالعان باستامانى «7-20-25» باعدارلاماسى ۇلگىسىندە بەرىلەتىن اۆتونەسيەمەن دە سالىستىرىپ كوردى.