مۇگەدەك بالا باعىپ وتىرعان وتباسىنا قانداي جاردەماقى تولەنەدى؟
الدىمەن ەرەكشە كۇتىمدى تالاپ ەتەتىن بالاسى بار اناعا (ءار بالا ءۇشىن) 31183 تەڭگە جاردەماقى بەرىلەدى. ودان بولەك، تۋىلعانىنان 1-توپقا جاتاتىن مۇگەدەكتىگى بار بالا كۇتىمى ءۇشىن 31183 تەڭگە جاردەماقى الادى. سونداي-اق، اي سايىن وتباسىنداعى ءار ادام باسىنا 15498 تەڭگە الەۋمەتتىك قولداۋ ماقساتىنداعى تولەم قاراستىرىلعان.
سونىمەن قاتار، ومىردە قيىن جاعدايعا تاپ بولعاندا، وعان قاجەتتى ءدارى-دارمەك پەن اقىلى مەديتسينالىق قىزمەتتى الۋ ءۇشىن جىلىنا ءبىر رەت 13 ا ە ك (32825 تەڭگە) كولەمىندە الەۋمەتتىك ءبىرجولعى تولەم بەرىلەدى. سول سياقتى ەرەكشە كۇتىمدى تالاپ ەتەتىن بالانى ۇيدەن وقىتۋ ماقساتىندا 6,5 ا ە ك (16413 تەڭگە) كولەمىندە وتەۋ تولەنەدى.
اتالعان كومەكتەن بولەك، ەرەكشە كۇتىمدى تالاپ ەتەتىن مۇشەسى بار وتباسى ساناتى بويىنشا باسپانا كەزەگىنە تۇرۋ مۇمكىندىگى بار. جانە ءۇي كۇتىمىندە ستاتسيونار مەن جارتىلاي ستاتسيونار جاعدايىندا ارنايى الەۋمەتتىك قىزمەتتى پايدالانۋعا بولادى.
الەۋمەتتىك قولداۋ قاتارىندا قالالىق قوعامدىق كولىكتە تەگىن ءجۇرۋ دە قاراستىرىلعان.
مۇگەدەكتىگى بار جاندارعا بەرىلەتىن جاردەماقى:
1-توپ - 57021 تەڭگە،
2-توپ - 45438 تەڭگە،
3-توپ - 30886 تەڭگە.
مۇگەدەكتىگى بار بالالارعا بەرىلەتىن جاردەماقى:
16 جاسقا دەيىن - 41578 تەڭگە،
1-توپ - 57021 تەڭگە،
2-توپ - 47220 تەڭگە،
3-توپ - 35638 تەڭگە.
ارنايى مەملەكەتتىك جاردەماقى:
1-توپ - 3763 تەڭگە،
2-توپ - 3763 تەڭگە،
3-توپ - 1616 تەڭگە.
ايتا كەتەيىك، وسى اپتادا ۇكىمەتتىڭ جانىنان ەل ازاماتتارىنىڭ تابىسىن ارتتىرۋ جانە تۇرمىس ساپاسىن جاقسارتۋ، سونداي-اق كوپبالالى وتباسىلارعا قولداۋ شارالارىن كۇشەيتۋ جونىندەگى جۇمىس توبى قۇرىلدى.
پرەمەر-ءمينيستردىڭ ورىنباسارى ەربولات دوسايەۆ باسشىلىق ەتەتىن بۇل توپتىڭ قۇرامىنا «نۇر وتان» پارتياسىنىڭ، الەۋمەتتىك-ەكونوميكالىق بلوك، ينفراقۇرىلىمدىق دامۋ، ىشكى ىستەر مينيسترلىكتەرىنىڭ جانە جەرگىلىكتى اتقارۋشى ورگانداردىڭ وكىلدەرى كىردى.
كوميسسيا جۇمىسىنا بەيىندى ۇ ە ۇ، ساراپشىلار مەن جۇرتشىلىق وكىلدەرى دە تارتىلعان. جۇمىس توبى ەكى اي ىشىندە مەملەكەت باسشىسى كوپبالالى جانە مۇگەدەك بالا اسىراپ وتىرعان وتباسىلاردى قولداۋ بويىنشا تاپسىرمالارىن ورىنداۋدا كەشەندى شارالار قابىلداۋى قاجەت.