قانداي نوتاريۋستار كوبىرەك اقشا تابادى؟

استانا. قازاقپارات - ادىلەت ءمينيسترى مارات بەكەتايەۆ سوت ورىنداۋشىلارى مەن نوتاريۋستار اراسىنداعى جۇمىستىڭ ءتيىمدى امال-ءادىسىن تابۋ ماسەلەسى تۋرالى ويىمەن ءبولىستى، دەپ حابارلايدى قازاقپارات ءتىلشىسى.

«قازىرگى ۋاقىتتا ءبىز سوت ورىنداۋشىلىق، ادۆوكاتۋرا مەن نوتاريات سالاسىنداعى تەندەنتسيانى كورىپ وتىرمىز. جاڭا سيپاتتا جۇمىس اتقاراتىن سوت ورىنداۋشىلارى بارشىلىق. ماسەلەن، سوت ورىنداۋشى ۇيىندە تۇندە ۇيىقتاپ جاتقان كەزدە وعان اۋەجايدان بىرەۋ حابارلاسىپ، ۇشاققا وتىرۋعا رۇقساتى جوق ەكەنىن ايتىپ شاعىمدانۋى ىقتيمال. وسى رەتتە كۇنى ەرتەڭىندە كەڭسەگە كەلۋىن ءوتىنىپ، تۇتقانى قويا سالاتىن سوت ورىنداۋشىلارى بار دا، ال كەي جاعدايدا كولل-ورتالىقتىڭ ءنومىرىن بەرەتىن دە سوت ورىنداۋشىلارى بارشىلىق»، - دەدى ادىلەت ءمينيسترى ۆەدومستۆونىڭ كەڭەيتىلگەن القا وتىرىسىندا.

بەكەتايەۆتىڭ ايتۋىنا قاراعاندا، ايتىلعان سوڭعى امال-ءادىس كليەنتتەر ءۇشىن تارتىستا وڭ ناتيجەسىن بەرەدى.

«ول حابارلاسقان ادامعا بەلگىلى ءبىر اۋەجايدا تەرمينالعا جاقىنداپ، قارىزدى وتەۋگە بولاتىنى تۋرالى ەسكەرتىلەدى. ال تۇتقانى قويا سالعان سوت ورىنداۋشى ادامعا تەز ارادا كومەكتەسۋدىڭ ورنىنا كوميسسيا تولەمىنەن قاعىلادى. ناقتىراق ايتقاندا، بۇل سالاداعى كاسىبي مامانداردىڭ اراسىندا باسەكەلەستىك قىزايىن دەپ تۇر. مۇنىڭ ارتى البەتتە، قىزمەت ساپاسىنىڭ جاقسارۋىنا مۇرىندىق بولادى»، - دەدى مارات بەكەتايەۆ.

مينيستر ءوز سوزىندە نوتاريۋستىڭ قىزمەتىندە دە وسىنداي باسەكە بولاتىنىن ايتادى.

«ساعات 09.00-18.00 اراسىندا عانا جۇمىس ىستەيتىن نوتاريۋستار وسى كۇن تارتىبىنە ۇيرەنىپ العان. ولاردىڭ كليەنتتىك بازاسى دا بار. ال تاۋلىك بويى قالانىڭ كەز كەلگەن نۇكتەسىنە جەتىپ، قىزمەت كورسەتۋگە دايار نوتاريۋستار كوبىرەك كليەنتتەرگە يە بولادى. ادامدار ءۇشىن بۇل جۇيە وتە ءتيىمدى. ءتىپتى مەنىڭ دە ءوزىم نوتاريۋس قىزمەتىنە قالاي جۇگىنگەنىم ەسىمدە. بۇرىن قالاي ەدى، بۇگىن قالاي بولدى!؟ كەزەك كۇتىپ، نوتاريۋستى ءبىر جەرگە شاقىرىپ الۋ كۇردەلى ەدى. ال قازىر مۇنداي ماسەلەلەر جوق»، - دەيدى مارات بەكەتايەۆ.