ەلباسى گاز كەن ورىندارىنا گەولوگيالىق بارلاۋدى جانداندىرۋدى تاپسىردى

 استانا. قازاقپارات - ق ر پرەزيدەنتى قاۋىپسىزدىك كەڭەسىنىڭ وتىرىسىندا گاز كەن ورىندارىنا گەولوگيالىق بارلاۋدى جانداندىرۋدى تاپسىردى. بۇل تۋرالى بۇگىن ق ر ەنەرگەتيكا مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى قانات بوزىمبايەۆ ايتتى، دەپ حابارلايدى قازاقپارات ءتىلشىسى.

«سالانىڭ بارلىق مىندەتتەرىن جۇزەگە اسىرۋ ءۇشىن رەسۋرستىق بازالاردى، ءتيىستى ماسەلەلەردى ودان ارى پىسىقتاۋ قاجەت. وسىعان بايلانىستى 7 - اقپان كۇنى وتكەن قاۋىپسىزدىك كەڭەسىنىڭ وتىرىسىندا ەلباسى گەولوگيالق بارلاۋدى، ونىڭ ىشىندە گاز رەسۋرستارىن بارلاۋدى جانداندىرۋدى تاپسىردى. سوندىقتان مينيسترلىك قازمۇنايگازبەن بىرگە ازىرلەنىپ جاتقان 2021-2025 -جىلدارعا ارنالعان گەولوگيالىق بارلاۋ باعدارلاماسى اياسىندا گاز كەن ورىندارىن گەولوگيالىق بارلاۋ جۇمىستارىن جانداندىرۋى قاجەت. ءبىرىنشى ۆيتسە- مينيستر ماحامبەت دوسمۇحامبەتوۆكە مۇنى باقىلاۋعا الۋدى تاپسىرامىن» ، - دەدى ق. بوزىمبايەۆ.

جالپى، ونىڭ دەرەگىنشە، 2018 -جىلى ەلىمىزدە 55,5 ميلليارد تەكشە مەتر گاز وندىرىلگەن. 2017 -جىلمەن سالىستىرعاندا ءوسىم 5 پايىزدى قۇرايدى. ال اعىمداعى جىلى ەلىمىز 55 ميلليارد تەكشە مەتر گاز ءوندىرۋدى جوسپارلاپ وتىر.

تاۋارلىق گاز ءوندىرۋ كولەمى دە 54 پايىزعا ارتىپ، 33,3 ميلليارد تەكشە مەترگە جەتىپ وتىر. ال سۇيىتىلعان گازدىڭ وتكەن جىلعى وندىرىلگەن كولەمى 3,1 ميلليون توننانى قۇرادى.

«ەلدىڭ گازداندىرىلۋ دەڭگەيى 2019 -جىلدىڭ 1 قاڭتارىندا 49,68 پايىزعا جەتتى. 2017 -جىلمەن سالىستىرعاندا 23 پايىز ءوسىم بار. 9 ميلليون ادام كوگىلدىر وتىنعا قول جەتكىزگەن. ال اعىمداعى جىلدىڭ قورىتىندىسىندا گازداندىرۋ دەڭگەيى 50,5 پايىزعا جەتەتىندىگى جوسپارلانعان» ، - دەدى ق. بوزىمبايەۆ.