قاسىم-جومارت توقايەۆ قازاقستاننىڭ ە ا ە و ەلدەرىمەن ءوزارا ساۋداسى تۋرالى ايتتى

بۇل تۋرالى ول سەناتتا ە ا ە و- داعى قازاقستاننىڭ ساۋدا ساياساتىن ىسكە اسىرۋ ماسەلەلەرى تۋرالى ۇكىمەت ساعاتىندا ءمالىم ەتتى، دەپ حابارلايدى قازاقپارات.

«ە ا ە و ەلدەرىنىڭ پارلامەنتتەرى مەن ۇكىمەتتەرى وداقتىڭ قۇقىقتىق بازاسىن قالىپتاستىرۋ جۇمىستارىن جالعاستىرۋدا. بىرلەستىك اياسىندا قابىلدانعان 20 دان استام حالىقارالىق قۇجات راتيفيكاتسيالاندى. وتكەن جىلدان باستاپ جاڭا كەدەن كودەكسى كۇشىنە ەندى. وسى ورايدا ەلەكتروندىق قۇجات اينالىمىن پايدالانۋ مەن كەدەندىك رەتتەۋدى سايكەستەندىرۋ ە ا ە و- عا مۇشە ەلدەر كەدەندىك ورگاندارى اراسىندا ىنتىماقتاستىقتى ايتارلىقتاي ارتتىردى»، - دەپ توقتالدى سەنات ءتوراعاسى.

ونىڭ سوزىنە قاراعاندا، سىرتقى قولايسىز جاعدايلار مەن تاۋەكەلدەرگە قاراماستان بىرلەستىك اياسىنداعى ىشكى جانە سىرتقى ساۋدادا وڭتايلى قارقىندى قامتاماسىز ەتۋگە مۇمكىن بولدى.

«2017-جىلدىڭ سايكەس كەزەڭىمەن سالىستىرعاندا، 2018-جىلدىڭ قاڭتار-قازان ارالىعىندا قازاقستان مەن ەۋرازيالىق ەكونوميكالىق وداق ەلدەرى اراسىنداعى تاۋار اينالىمى 7,2 پايىزعا ءوسىپ، 15,5 ميلليارد ا ق ش دوللارىن قۇرادى»، - دەدى قاسىم-جومارت توقايەۆ.