داۋرەن ابايەۆ: بيلىكتىڭ ترانزيتى تۋرالى ەشقانداي اڭگىمە جوق
بۇل پىكىردى «حابار» ارناسىنداعى «اشىق ديالوگ» باعدارلاماسىندا قوناقتا بولعان ق ر اقپارات جانە كوممۋنيكاتسيالار ءمينيسترى داۋرەن ابايەۆ ءبىلدىردى، دەپ حابارلايدى قازاقپارات ءتىلشىسى.
«وسى اپتادا مەملەكەت باسشىسىنىڭ كونستيتۋتسيالىق كەڭەسكە ءوتىنىش بەرۋى تۋرالى اقپاراتتىڭ ءبىرشاما تالقىعا تۇسكەنى بەلگىلى. وسىعان بايلانىستى الەۋمەتتىك جەلىدە ءالى دە قازاقستانداعى بيلىك ترانزيتى بولۋى مۇمكىن دەگەن پىكىر ءبىلدىرىپ جاتىر. بۇعان قاتىستى نە ايتار ەدىڭىز؟»، - دەپ سۇراق قويدى باعدارلاما جۇرگىزۋشىسى مينيستردەن.
بۇل سۇراققا جاۋاپ بەرگەن داۋرەن ابايەۆ بۇل تاقىرىپ تۋرالى بارلىق اڭگىمە ايتىلۋىنداي ايتىلعانىن جەتكىزدى.
«بۇل تاقىرىپتى جابايىق. بۇگىنگى تاڭدا بيلىكتىڭ ترانزيتى تۋرالى ەشقانداي اڭگىمە قوزعالعالى وتىرعان جوق. مەملەكەت باسشىسىنىڭ تۇسىندىرۋىنە ارتىق ءسوز قوسۋدىڭ قاجەتى دە جوق. كونستيتۋتسيالىق كەڭەسكە ءوتىنىش بەرۋ - ماڭىزدى، دەسە دە جۇمىس بابىنداعى پروتسەدۋرا. بۇل وتىنىشتەن ەكىنشى ماعىنانى ىزدەۋدىڭ قاجەتى شامالى. بۇلاي ماعىنا ىزدەۋدىڭ ءوزى لوگيكاعا قايشى. قازىرگى تاڭدا پرەزيدەنتتىڭ جۇمىسىنىڭ ەل ىشىندە دە، سىرتىندا دا تىعىز كەستەسى بار. مەملەكەت باسشىسىنىڭ ورتا مەرزىمدى جانە ۇزاق مەرزىمدى پەرسپەكتيۆالارعا قاتىستى وتە ماڭىزدى تاپسىرمالاردى جۇكتەگەنى بەلگىلى. جولداۋدا دا، ۇكىمەتتىڭ كەڭەيتىلگەن وتىرىسىندا دا، جاستار جىلىندا دا وسى تاپسىرمالار تۋرالى ايتىلعان ەدى»، - دەپ جاۋاپ بەردى داۋرەن ابايەۆ.
مينيستر ءوز سوزىندە وسىناۋ جاڭالىقتىڭ نەلىكتەن ءبىرشاما قاۋەسەت تاراتقانىنا بايلانىستى ويىن ءبىلدىردى.
«ترانزيتتىڭ ءوزى دە سان-ساققا وي تارتار تاقىرىپ ەكەنىن بىلەسىز. بۇل تاقىرىپقا قاتىستى كەز كەلگەن پىكىردىڭ ءوزى ەلدىڭ نازارىن اۋدارادى. مەنىڭ ءوزىم دە ترانزيت تاقىرىبى دەگەندە كەڭ تالقى مەن تالداۋ جاساپ جۇرەتىن ساراپشىلاردى بىلەمىن. جالپى، بۇل تاقىرىپتاعى پىكىرتالاستىڭ ءوز ءتارتىبى، ءوز جورامالى، ءوز بولجامى بار جەكە جۇيەنى ەسكە تۇسىرەدى. ول بولجامدار شىنايىلىققا ساي بولا بەرمەيدى. شىنىندا دا، پرەزيدەنتتە - ۇلت كوشباسشىسىندا حالىقتىڭ تابىسىن ارتتىرۋ بويىنشا تاپسىرمالارى بەكىتىلگەن ناقتى ءتارتىبى بار»، - دەيدى داۋرەن ابايەۆ.
ەسكە سالا كەتسەك، بۇعان دەيىن ق ر پرەزيدەنتى نۇرسۇلتان نازاربايەۆ ەلىمىزدىڭ كونستيتۋتسيالىق كەڭەسىنە جۇگىنۋ سەبەبىن تۇسىندىرگەنىن حابارلاعان بولاتىنبىز.