زاڭسىز بايىعان مەملەكەتتىك قىزمەتشىلەر جاۋاپقا تارتىلادى

 استانا. قازاقپارات - مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اليك شپەكبايەۆ سىبايلاس جەمقورلىققا قارسى ءىس- قيمىلدا قولداناتىن جاڭا شارالاردى باياندادى، دەپ حابارلايدى قازاقپارات.

ونىڭ ايتۋىنشا، زاڭسىز تابىس تاپقان مەملەكەتتىك قىزمەتشىلەر جاۋاپقا تارتىلادى.

«مەملەكەتتىك قىزمەتشىنىڭ شىعىندارى تابىسىنا سايكەس كەلمەگەنى ءۇشىن قاتاڭ جاۋاپقا تارتۋ شارالارىن ەنگىزۋدى ۇسىنامىز. بۇل 2020 -جىلى باستالاتىن جالپىعا ورتاق دەكلاراتسيانىڭ جالعاسى بولادى جانە سىبايلاس جەمقورلىقتىڭ نەگىزى بولعان زاڭسىز تابىسقا ۇمتىلۋدىڭ جولىن كەسەدى» ، - دەدى اگەنتتىك ءتوراعاسى كەڭەيتىلگەن القا وتىرىسىندا.

سونىمەن بىرگە، مەملەكەتتىك قىزمەتشىلەردىڭ ادالدىعىن تەكسەرەتىن «Integrity check»  ينستيتۋتىن ەنگىزۋدى ۇسىندى.

 «وتكەن جىلى اگەنتتىك، ۇلتتىق بيۋرو جانە اكادەميانىڭ 7 قىزمەتشىسى قىلمىستىق قۋدالاۋعا ءتۇستى، ونىڭ بەسەۋى سوتتالدى. ءوز قاتارىمىزدىڭ جەمقورلىقتان ادا بولۋى - باستى ۇستانىمىمىز. ىشكى قاۋىپسىزدىك باسقارماسى تۇراقتى تۇردە قىزمەتشىلەردىڭ جەمقورلىققا قاتىسى بار- جوعىن تەكسەرەدى. كەيىنىرەك بۇل تاجىريبەنى بارلىق قۇقىق قورعاۋ ورگاندارىنا تاراتامىز» ، - دەدى ا. شپەكبايەۆ.