ماگنيتتىك ءپوليۋستىڭ جىلجۋى ۇدەدى

  استانا. قازاقپارات - جەردىڭ سولتۇستىك ماگنيتتىك ءپوليۋسىنىڭ جىلدامدىعى سوڭعى ونجىلدىقتا بىرنەشە رەت ۇدەگەن. ونى ا ق ش- تىڭ قورشاعان ورتا جونىندەگى ۇلتتىق ينستيتۋتى عالىمدارى انىقتادى.

ساراپشىلار ماگنيتتىك ءپوليۋستى بەس جىلدا ءبىر رەت جاڭارتاتىن World Magnetic Model جوباسىنىڭ جاڭا دەرەكتەرىن جاريالادى. كەزەكتى مالىمەتتەر 2020 -جىلى جاريا ەتىلۋ كەرەك بولاتىن. ءبىراق ماگنيتتىك ءپوليۋستىڭ جىلجۋى ۇدەگەنىنە بايلانىستى جاڭا وزگەرىستەردى مەرزىمىنەن بۇرىن جاريالاۋعا تۋرا كەلگەن. جاڭا حابارلامادا، ماگنيتتىك پوليۋس كانادانىڭ انتاركتيدا سەكتورىنان سىبىرگە قاراي جىلجىپ جاتقاندىعى ايتىلعان. ماگنيتتىك پوليۋس ⅩⅩعاسىردا كانادا ارحيپەلاگىندا بولعان، سولتۇستىك گەوگرافيك پوليۋسكە قاراي جىلىنا 10 شاقىرىم جىلجىعان. 1990 -جىلداردىڭ سوڭىندا ماماندار ماگنيتتىك ءپوليۋستىڭ ايتارلىقتاي ۇدەگەنىن سەزگەن. 2001 -جىلى ول جىلىنا 40 شاقىرىم، 2007 -جىلى 50 شاقىرىم، قازىر جىلىنا 55 شاقىرىم جىلجىپ جاتىر. بولجامدارعا قاراعاندا، ماگنيتتىك پوليۋستىڭ كەنەتتەن ۇدەۋى جەر شارىنىڭ يادروسىنداعى بەلسەندىلىككە بايلانىستى. ماگنيتتىك پوليۋستىڭ جىلجۋى وسىلاي جالعاسسا عالامشارىمىزدا بۇكىل ناۆيگاتسياعا قاتەر توندىرەدى. جۇيەدەگى اقاۋلار، دۇرىس ىستەمەگەن قۇرىلعىلاردىڭ سەبەبىنەن ۇشاقتار مەن كەمەلەر اپاتقا ۇشىراۋى مۇمكىن. عالىمدار ماگنيتتىك ءپوليۋستىڭ جىلجۋى بولاشاقتا جەر شارىنا قالاي اسەر ەتەتىنىنە الاڭداۋلى. بولجامدارعا قاراعاندا، ميلليونداعان جىلدار بۇرىن ماگنيتتىك ءپوليۋستىڭ جىلجۋى جەر شارىنداعى دينوزاۆرلار قىرىلىپ كەتكەن اپاتتىڭ كەلىپ شىعۋىنا سەبەپ بولعان.

Massaget.kz