گەرمانيادا اۆتوبۋستاعىلاردى قۇتقارعان جولاۋشى قوعامدىق كولىكتە ءومىر بويى تەگىن جۇرەتىن بولدى

استانا. قازاقپارات - گەرمانيادا ەرلىك جاساعان جولاۋشىعا ءومىر بويى قوعامدىق كولىكتە تەگىن ءجۇرۋ قۇقى بەرىلدى.

اۆتوبۋس جۇرگىزۋشىسى ەسىنەن تانىپ قالعان سوڭ، جولاۋشىلاردىڭ ءبىرى كولىكتى امالىن تاۋىپ توقتاتىپ العان، دەپ حابارلايدى قازاقپارات dw.com سىلتەمە جاساپ.

گەرمانيانىڭ دۋيسبۋرگ قالاسىندا جولدا ءجۇرىپ بارا جاتقان اۆتوبۋستىڭ 58 جاستاعى جۇرگىزۋشىسى ەسىنەن تانىپ قالادى. باسقارۋسىز اۆتوبۋس قاراما-قارسى باعىتقا شىعىپ، جول شەتىندەگى قورشاۋدى بۇزىپ كەتكەن. جولاۋشىلاردىڭ ءبىرى كابيناعا ءوتىپ، كولىكتى «تىزگىندەپ»، ونى توقتاتىپ الدى.

اپاتتىڭ الدى الىنعان سوڭ، جاس جولاۋشى اۆتوبۋستان شىعىپ جونىمەن كەتە بارعان.

«مەن ايتارلىقتاي ەشتەڭە ىستەگەن جوقپىن»، - دەيدى 24 جاستاعى و. موحاممەد.

قايعىلى وقيعاعا جول بەرمەگەنى ءۇشىن وعان ەرەكشە قۇرمەت كورسەتىلدى. DVG كولىك كومپانياسى قالاداعى قوعامدىق كولىكتە ءومىر بويى تەگىن جۇرۋگە قۇقىق بەرەتىن بيلەتتى تابىستادى، دەپ جازادى General-Anzeiger باسىلىمى.