استانادا ايالداماعا سوعىلعان اۆتوبۋستىڭ جۇرگىزۋشىسى قارا تىزىمگە ەنگىزىلدى

استانا. قازاقپارات - «استانا LRT»  كومپانياسىنىڭ باسپا ءسوز قىزمەتى ايالداما پاۆيلونىنا كىرىپ كەتكەن اۆتوبۋستىڭ جۇرگىزۋشىسىنە قاتىستى قانداي شارا قابىلدانعانىن ءمالىم ەتتى، دەپ حابارلايدى قازاقپارات ءتىلشىسى.

ەسكە سالا كەتسەك، ەلوردادا 5 -اقپان كۇنى قوعامدىق كولىكتەردىڭ ءبىرى ايالداما پاۆيلونىنا سوعىلىپ، جول-كولىك وقيعاسى سالدارىنان 1 ادام جاراقات العان بولاتىن.

«اتالعان وقيعا بويىنشا پوليتسيا دەپارتامەنتىنىڭ اكىمشىلىك پوليتسيا باسقارماسىنىڭ قىزمەتكەرلەرى اكىمشىلىك حاتتاما تولتىردى. اۆتوبۋستىڭ جۇرگىزۋشىسى بۇرىن جول-كولىك وقيعاسىنا تۇسپەگەن. كولىك جۇرگىزۋشىسى رەتىندە التى جىل تاجىريبەسى بار. اۆتوپارك باسشىلىعى جۇرگىزۋشىنى قىزمەتىنەن ايىرىپ، قارا تىزىمگە ەنگىزۋ تۋرالى شەشىم قابىلدادى. ول دەگەنىڭىز اتالمىش جۇرگىزۋشىنىڭ ەلورداداعى قوعامدىق كولىكتە جۇمىس اتقارا المايتىنىن بىلدىرەدى»، - دەپ حابارلادى كومپانيانىڭ باسپا ءسوز قىزمەتى رەداكسيانىڭ ساۋال حاتىنا بەرگەن جاۋابىندا.

اۆتورى: ازامات سىزدىقبايەۆ