قازاقستاندا جۇرەككە تاعى ءبىر يننوۆاتسيالىق وتا جاسالدى

ونىڭ باستى ەرەكشەلىگى سول، ادامنىڭ جۇرەگىنە سىمسىز قاناينالىم قۇرىلعىسى ورناتىلدى، دەپ حابارلايدى قازاقپارات ءتىلشىسى.

ورتالىق باسشىسى يۋري پيانىڭ ايتۋىنشا، جۇرەكتىڭ سول جاق قارىنشاسىنىڭ كومەكشى قۇرىلعىسى ادامعا ەركىن قوزعالۋعا مۇمكىندىك بەرەدى. سەبەبى سىرتقا ەشقانداي كابەلدەر شىعارىلمايدى. ال قاناينالىم قۇرىلعىسىن زاريادتاۋ وڭاي، ونىڭ قۋاتى 8 ساعاتقا جەتەدى. بىرەگەي وپەراتسيا 24 جاستاعى يسمايل تۇرسىنوۆقا جاسالدى.

«مەن ونى عارىشقا ۇشقان كوسموناۆتقا تەڭەيتىن ەدىم. سەبەبى وعان الەم بويىنشا العاش رەت يننوۆاتسيالىق قۇرىلعىنى ورناتۋ وپەراتسياسى جاسالدى. ناۋقاس بولىپ تۇسكەندە ول ءوز بولمەسىنەن شىعا المايتىن، قاتتى دەمىكپەسى بولدى. سول سەبەپتى ۇنەمى دارىگەرلەردىڭ باقىلاۋىندا ءجۇردى. قازىر جاعدايى جاقسى، دالادا قىدىرادى، سپورت زالدا جاتتىعادى، ءتىپتى، باسسەينگە دە تۇسە الادى»، - دەدى يۋ.

يننوۆاتسيالىق قۇرىلعى يزرايلدە جاسالعان. ونىڭ قىزمەتى كادىمگىدەي كارديوستيمۋلياتورمەن بىردەي. ءبىراق ەشقانداي سىمدارى جوق. سونىڭ ارقاسىندا ەركىن قوزعالىپ، سالاۋاتتى ءومىر سالتىن ۇستانۋعا تولىق مۇمكىندىك بار.

«بۇرىن دەنەدەن سىم شىعاتىن جەردە باكتەريالار جينالاتىن، ول جەردى ۇنەمى ەمدەپ وتىرۋ قاجەت. ال جاڭا قۇرىلعىدا ونداي سىمدار جوق. ۇلكەن سومكەنى بىرگە الىپ ءجۇرۋدىڭ قاجەتى دە شامالى. ادام ەشبىر كەدەرگىسىز جۇرە الادى، دۋشقا تۇسە الادى جانە تاعىسىن تاعى. اتالعان اپپارات ادامنىڭ اعزاسىنا تولىعىمەن ورناتىلادى. سونىڭ ناتيجەسىندە ءومىر ءسۇرۋ ساپاسى دا جاقسارادى»، - دەيدى دوكتور مانديپ مەحرا.

جاڭا اپپاراتتىڭ باتارەياسى كەۋدەنىڭ ىشىندە سول جاقتا ورناتىلعان. ونى ارنايى بەلبەۋ ارقىلى ماگنيتتىك تولقىنمەن زاريادتايدى.

ال ارنايى قولساعات جۇرەكتىڭ سوعۋىن، قاننىڭ قىسىمىن جانە تاعى باسقا مالىمەتتەردى كورسەتىپ تۇرادى. يۋ. پيانىڭ سوزىنە قاراعاندا، العاشقى وپەراتسيادان كەيىن يسمايل تۇرسىنوۆ دارىگەرلەردىڭ باقىلاۋىندا بولادى. ءبارى ءساتتى بولسا، جاڭا تەحنولوگيانىڭ كۋالىگىن الۋ جوسپارلانعان. سودان كەيىن ونى تەگىن مەديتسينالىق كومەكتىڭ ساناتىنا قوسۋعا بولادى. سول كەزدە يننوۆاتسيالىق قۇرىلعىنى قازاقستاندىقتارعا تەگىن ورناتۋعا مۇمكىندىك بار.