تۇركىستانداعى تاريحي قازبا جۇمىستارىنا جاستار تارتىلماق

تۇركىستان. قازاقپارات - قازاق عىلىمي - زەرتتەۋ مادەنيەت ينستيتۋتى مەن وتىرار اۋداندىق جاستار ورتالىعى بىرلەسىپ العاشقى بولىپ «جاستار جىلىنا» وراي ءبىرقاتار جۇمىسسىز جاستاردى جۇمىسپەن قامتىدى، دەپ حابارلايدى قازاقپارات ءتىلشىسى.

جۋىردا عانا ەلباسى نۇرسۇلتان نازاربايەۆ بيىلعى جىلدى «جاستار جىلى» دەپ جاريالاعانى بەلگىلى. بۇگىندە ەلىمىزدىڭ مادەنيەت جانە سپورت مينيسترلىگىنىڭ قولداۋىمەن «ازىرەت سۇلتان» مەملەكەتتىك تاريحي-مادەني قورىق-مۋزەيىنە قاراستى كۇلتوبە قالاشىعى ماڭايىندا ارحەولوگيالىق قازبا جۇمىستارى جۇرگىزىلۋدە.

«اۋداننىڭ 20 عا جۋىق جاستارىن كيەلى تۇركىستان قالاسىنداعى ارحەولوگيالىق قازبا جۇمىستارىنا الىپ كەلدىك. الداعى ۋاقىتتا دا بۇل ورتالىقپەن تىعىز قارىم-قاتىناس ورناتا وتىرىپ، جاس ماماندار قاجەت بولىپ جاتسا قامتاماسىز ەتۋگە كۇش سالاتىن بولامىز. اۋداندا قازىر جۇمىسسىز جاستار ءتىزىمى دايارلانۋدا. تۇركىستاندى تۇلەتۋگە قولداۋ بىلدىرە وتىرىپ، تيىسىنشە باسقا دا سالالارعا قاجەتتى جاستاردى تۇگەلدەي جىبەرۋگە اتسالىسامىز»، - دەدى وتىرار اۋداندىق جاستار رەسۋرستىق ورتالىعىنىڭ ديرەكتورى داۋرەن اقساقالوۆ.

بۇگىنگى تاڭدا، كۇلتوبەدە قازبا جۇمىستارىن جۇرگىزىپ جاتقان 80 نەن اسا ارحەولوگتىڭ باسىم بولىگىن جاستار قۇرايدى.

«وتىرار مەن تۇركىستان ءبىر-بىرىنە جاقىن، ءارى تاريحى دا تىعىز بايلانىستى. ەلباسى نۇرسۇلتان ءابىش ۇلى نازاربايەۆتىڭ تاريحي شەشىمى جاستار جىلىمەن ۇشتاسۋى دا ايتۋلى جاعداي. ءبىز وتىرار اۋدانىنىڭ جاستارى تاريحي جۇمىستارعا ءوزىمىز بەلسەنە كىرىسىپ، ەڭبەگىمىز ارقىلى قولداۋ بىلدىرەتىنىمىزگە قۋانىشتىمىز. كونە قالالاردى انىقتاۋ ءۇشىن ۇقىپتى، ءارى زەيىندى بولۋ باستى ورىندا. جۇمىس وتە قىزىقتى ەكەن»، - دەيدى وتىرارلىق جاس ارحەولوگ ءالي سەراليەۆ. الداعى ۋاقىتتا اۋدانداعى جاستاردىڭ ەڭبەككە قابىلەتتىلىگى ەسكەرىلە وتىرىپ، تۇركىستانداعى قارقىندى جۇمىسقا قاجەتىنشە جۇمىلدىرىلماق.