قاتەرلى ىسىكتەن ايىعۋدىڭ جاڭا ءادىسى ويلاپ تابىلدى

 استانا. قازاقپارات - ۇلى بريتانيانىڭ سولفورد ۋنيۆەرسيتەتىنىڭ عالىمدارى قاتەرلى ىسىك جاسۋشالارىن انىقتاۋدىڭ جاڭا ءادىسىن ويلاپ تاپتى.

مامانداردىڭ ايتۋىنشا، وسى جاسۋشالار ءارى قاراي تارالسا، ادام قاتەرلى ىسىككە شالدىعۋى مۇمكىن. وسىلايشا، زەرتتەۋشىلەر باعانالىق جاسۋشالاردى ءدارى-دارمەكتەرمەن جويىپ، قاتەرلى ىسىكتىڭ الدىن الۋعا بولاتىنىن ايتادى، - دەپ جازادى Lenta.ru.

باسىلىمنىڭ مالىمەتىنشە، عالىمدار ادام اعزاسىنان بولىنەتىن ءسۇت بەزىندەگى قاتەرلى ىسىك جاسۋشالارىنىڭ ۇلگىسىن زەرتتەپ، بۇكىل جاسۋشانىڭ 0,2 پايىزى قاتەرلى باعانالىق جاسۋشالار ەكەنىن جانە ونىڭ ەرەكشە بەلگىلەرى بار ەكەنىن انىقتاعان. ول جاسۋشالار ادامنىڭ قانتامىرلارىنا، ءارى قاراي باسقا دا ورگاندار مەن تىندەرگە وتەدى. وسىلايشا، عالىمداردىڭ سوزىنە سۇيەنسەك، قاتەرلى ىسىكتىڭ باستى بەلگىسى مەتاستاز جۇرەدى ەكەن.

ايتا كەتەيىك، مەتاستاز دەگەنىمىز - اۋرۋ تۋدىراتىن ىسىك جاسۋشالارىنىڭ زاقىمدانعان وشاقتان قان نەمەسە ليمفا اعىنىمەن بىرگە ورىن اۋىستىرىپ تارالۋى ناتيجەسىندە پايدا بولاتىن ەكىنشى رەتتىك پاتولوگيالىق وشاق. سونداي-اق، ماماندار جاسۋشالاردىڭ ءبۇل ءتۇرى بەلگىلى ءبىر ۋاقىت بويى جارىق ساۋلەلەرىن جۇتىپ الاتىنىن انىقتاعان. ولاردىڭ ايتۋىنشا، الداعى ۋاقىتتا بۇل پروتسەستى دە توقتاتاتىن ءدارى-دارىمەكتەر ويلاستىرىلادى.