بالگەرگە بارىپ، بايىپ كەتكىسى كەلگەن ايەل پاتەرىنەن ايىرىلىپ قالدى

  استانا. قازاقپارات - رەسەيدە سيقىرشىلىق قىزمەتتىڭ اقىسىن تولەۋ ءۇشىن قارىز الماق بولعان ايەل ۇيىنەن ايىرىلدى. ول ءۇيىن كەپىلگە قويۋ ارقىلى قارىز الۋ كەلىسىمشارتىنىڭ ورنىنا جىلجىمايتىن مۇلىكتى ساتىپ الۋ- ساتۋ كەلىسىمشارتىنا قول قويىپ جىبەرىپتى.

بۇل تۋرالى «ريفەي- پەرم» تەلەكومپانياسىنا سىلتەمە جاساپ Stan.kz حابارلايدى.

«ءبىزدىڭ پاتەرىمىزگە كىرگىزبەيدى. قۇلپىن اۋىستىرىپ تاستاعان. كىلتىن بەرمەيدى» ، - دەيدى زارداپ شەككەن زەينەتكەر تاتيانا ۋشاكوۆا.

بەلگىلى بولعانداي، ۋشاكوۆا دەنساۋلىعى ءۇشىن الاڭداپ، حابارلاندىرۋ ارقىلى تاپقان بالگەرلەرگە بارعان. ءوز كەزەگىندە بالگەرلەر ايەلدى ەمدەپ قانا قويماي، بايلىققا كەنەلۋگە كومەكتەسەتىنىن ايتقان.

وسىلايشا ولار قاشىقتىقتان، ياعني تەلەفون ارقىلى سويلەسىپ، سيقىر جاساماق بولعان. مۇنداي قىزمەتىنىڭ اقىسى دا از ەمەس. قۇنى - 2 ميلليون رۋبل (11 ميلليون تەڭگەدەن اسا) .

ايەلدىڭ سوزىنشە، ءوزىن بالگەرمىن دەپ تانىستىرعان ەر ادام ماسكەۋدە تۇراتىنىن جانە ارىپتەسىمەن بىرگە «ەكستراسەنستەر شايقاسى» شوۋىنىڭ ساراپشىسى ميحايل ۆينوگرادوۆپەن سەرىكتەستىكتە ەكەنىن ايتقان.

ۋشاكوۆا بالگەرلەر سۇراعان اقشانى تاۋىپ بەرۋ ءۇشىن ميكروقارجى ۇيىمدارىنىڭ بىرىنە جۇگىنىپ، ەكى بولمەلى پاتەرىن كەپىلگە قويۋ ارقىلى قارىز الماق بولعان. الايدا ۇيىم قىزمەتكەرلەرى وعان تۇرعىن ءۇيدى ساتىپ الۋ- ساتۋ كەلىسىمشارتىن ۇسىنعان. سونىمەن قاتار كەلىسىمشارتتا جىلجىمايتىن مۇلىك ءۇشىن وتە تومەن باعا كورسەتىلىپتى. وسىلايشا، ولار كەلىسىمشارت جاساسىپ، ارتىنشا پاتەردى وزگە تۇلعانىڭ اتىنا اۋدارعان.

زەينەتكەر الاياقتارعا الدانعانىن ءتۇسىنىپ، ولاردى سوتقا بەردى. الايدا سوت ونىڭ كەلىسىمشارتتى جوققا شىعارۋ تۋرالى تالابىن قاناعاتتاندىرمادى.