مەملەكەتتىك قىزمەتكەرلەردىڭ ادەپ كودەكسىن بۇزۋ جاعدايلارى سيرەدى - جازيرا جىلقىشيەۆا

استانا. قازاقپارات - ەلوردالىق مەملەكەتتىك قىزمەتكەرلەر ادەپ نورماسىن بۇزۋدى ازايتتى.

بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتىنىڭ باسشىسى جازيرا جىلقىييەۆا ەلوردا اكىمدىگىندە وتكەن باسپا ءسوز ءماسليحاتىندا ءمالىم ەتتى، دەپ حابارلايدى قازاقپارات ءتىلشىسى.

«2017-جىلى استانادا مەملەكەتتىك قىزمەتكەرلەردىڭ ادەپ نورماسىنا قاتىستى 54 ماسەلە قارالسا، وتكەن جىلى بۇل كورسەتكىش 33 كە ازايدى. ال ادەپ كودەكسىن بۇزۋ وقيعاسى بويىنشا وتكەن جىلى 5 ءىس قوزعالدى، ال ونىڭ الدىڭعى جىلى 26 ءىس قارالعان بولاتىن. ودان بولەك، 2018-جىلدىڭ قورىتىندىسى بويىنشا جەرگىلىكتى اتقارۋشى ورگان قىزمەتكەرلەرى اراسىندا ىشىمدىك قولدانۋ وقيعاسى تىركەلمەگەندىگىن ايتىپ وتكەن ءجون»، - دەدى ول.

ونىڭ ايتۋىنشا، ايتۋلى كورسەتكىشكە سەبەپ، مەملەكەتتىك قىزمەتكەرلەر اراسىندا جۇرگىزىلگەن پروفيلاكتيكالىق جۇمىستاردىڭ ناتيجەسى.

«2017-جىلى ەلوردالىق مەملەكەتتىك قىزمەتكەرلەر اراسىندا مەملەكەتتىك قىزمەت جانە ادەپ نورماسىنا قاتىستى 24 پروفيلاكتيكالىق شارا ۇيىمداستىرىلسا، وتكەن جىلى 34 شارا وتكىزىلدى. سونىمەن قاتار، ەلوردالىق مەمقىزمەتكەرلەردىڭ جالاقىسى 2,5 ەسەگە ءوسىرىلدى، بۇل دا قىزمەتتى ادال اتقارۋعا ءوز اسەرىن تيگىزەدى»، - دەدى ج. جىلقىشيەۆا.

ودان بولەك، دەپارتامەنت باسشىسىنىڭ دەرەگىنە سۇيەنسەك، قالا اكىمدىگىنە ەلوردالىق مەمقىزمەتكەرلەر ءۇشىن تۇرعىن ءۇي نەسيەسىن بەرۋدە ارنايى جەڭىلدىكتەر قاراستىرۋ ۇسىنىلدى جانە ولارعا قالالىق قوعامدىق دەنساۋلىق ساقتاۋ باسقارماسىمەن بىرلەسە وتىرىپ تەگىن مەديتسينالىق تەكسەرۋ ۇيىمداستىرىلدى.

بۇعان دەيىن حابارلاعانىمىزداي ج. جىلقىشيەۆا استانادا مەملەكەتتىك ورگانداردا 190 بوس ورىن بارىن ايتىپ وتكەن بولاتىن.