لاڭكەستىك ارەكەت تۋرالى جالعان اقپارات تاراتۋ وقيعاسى ازايدى - ءى ءى م

بۇل تۋرالى ق ر ىشكى ىستەر مينيسترلىگىنىڭ رەسمي وكىلى الماس سادۋبايەۆ ايتتى، دەپ حابارلايدى قازاقپارات ءتىلشىسى.

«سوڭعى جىلدارى قابىلدانعان شارالاردىڭ ناتيجەسىندە لاڭكەستىك ارەكەت تۋرالى جالعان اقپاراتتار تاراتۋ قىلمىسى ايتارلىقتاي ازايدى. قازىرگى ۋاقىتتا پوليتسيا قىزمەتكەرلەرى بۇل باعىتتا جەتكىلىكتى تاجىريبە جيناقتاعان، سونداي-اق وسىنداي قىلمىستاردى دەر كەزىندە اشۋعا مۇمكىندىك بەرەتىن جاڭا تەحنيكالىق قۇرالدارمەن جابدىقتالعان»، - دەدى مينيسترلىك وكىلى.

ونىڭ ايتۋىنشا، مۇنداي قىلمىستار نەگىزىنەن بۇزاقىلىق نەمەسە پايداكۇنەمدىكتىڭ سالدارىنان ورىن الادى.

«جالعان اقپارات تاراتقاندارعا زاڭ بويىنشا 5 جىلعا دەيىن باس بوستاندىعىنان ايىرۋ جازاسى قاراستىرىلعان. قاۋىپ-قاتەرلەر تۋرالى جالعان اقپارات قالىپتى ءومىر ىرعاعىن بۇزىپ، توتەنشە جاعداي تۋدىرادى. قۇقىق قورعاۋ ورگاندارى حابارلامانى تەكسەرۋ ءۇشىن ارنايى كۇش-قۇرالدارىن جۇمىلدىراتىنىن ايتىپ وتكەن ءجون. ال بۇل ءوز كەزەگىندە ولاردى نەگىزگى قىزمەتتەرىنەن الاڭداتادى. سول سەبەپتەن اتالعان قىلمىس تۇرىنە قاتاڭ جازا قاراستىرىلعان»، - دەيدى ا. سادۋبايەۆ.

ق ر ءى ءى م رەسمي وكىلىنىڭ دەرەگىنە سۇيەنسەك، سوڭعى 5 جىلدا تەلەفون لاڭكەستىگىنە بايلانىستى 258 ادام قىلمىستىق جاۋاپكەرشىلىككە تارتىلعان.