ءانشى-كومپوزيتور گاۋھار الىمبەكوۆا تۇرمەدەن شىقتى

 استانا. قازاقپارات - ونەر جۇلدىزى سوت ۇكىمىمەن الاياقتىق جاسادى دەپ تانىلىپ، التى جىلعا سوتتالعان بولاتىن.

بۇگىن ءانشى گاۋھار الىمبەكوۆا قولحاتپەن بوساتىلىپ، ۇيىنە ورالدى. بۇل تۋرالى جۋرناليست بيبىگۇل داۋلەتبەك الەۋمەتتىك جەلىدەگى پاراقشاسىندا حابارلادى.

«قۇتتى بولسىن! «ءبىر قۋانىش، ءبىر ءۇمىت» دەگەن وسى... ازىرگە ءانشى ءۇيقاماقتا. سوت شەشىمى شىققانشا قولحاتپەن بوساتىلدى»، - دەپ جازدى داۋلەتبەك.

ەسكە سالا كەتسەك، 30 -قاڭتاردا الماتى قالاسى المالى اۋداندىق سوتى ونەر جۇلدىزىن الاياقتىق جاساعانى ءۇشىن كىنالى دەپ تاۋىپ، 6 جىلعا باس بوستاندىعىنان ايىرعان بولاتىن. انشىمەن قوسا سوت الدىندا 2016 -جىلى 6 جىل 8 ايعا باس بوستاندىعىنان ايىرىلعان فەرۋزا وردابايەۆا دا جاۋاپ بەردى.

انىقتالعانداي، ايىپتالۋشىلار تانىسىنا ءىرى تۇرعىن ءۇي كەشەنىنەن پاتەر ساتىپ الىپ بەرۋدى ۋادە ەتىپ، اقشانى قايتارماي قويعان.

فەرۋزا وردابايەۆا 190-باپتىڭ 4-بولىگى 2-تارماعى بويىنشا كىنالى دەپ تانىلىپ، 6 جىل 8 ايعا باس بوستاندىعىنان ايىرۋ جازاسىنا كەسىلدى. ول بۇعان دەيىن دە سوتتالعانى، جازاسىنىڭ ءبىر بولىگىن ءالى وتەمەگەنى بەلگىلى بولدى.

جۋىردا گاۋھار الىمبەكوۆا ءوزىنىڭ اماندىعىن ءبىلدىرىپ، تۇرمەدەن حات جولداعان ەدى. ءانشى حاتىندا ءوزىن سوتقا بەرگەن جابىرلەنۋشى باقىت نازاروۆاعا جاماندىق تىلەمەيتىنىن، اللا رازىلىعى ءۇشىن كەشىرگەنىن جازعان بولاتىن.


دەرەككوز: Sputnik