وتكەن جىلى قازاقستاننىڭ وڭتۇستىگىنەن سولتۇستىگىنە قانشا ازامات قونىس اۋداردى
مينيسترلىكتەن حابارلانعانداي، 2018-جىلى كوشىپ كەلۋشىلەردى قابىلداۋدىڭ ايماقتىق كۆوتاسى - 1517. قونىس اۋداراتىن وتباسى نەمەسە 6363 ادام دەپ بەلگىلەنگەن بولاتىن. وسى جوسپار بويىنشا ءبىر جىل ىشىندە 6766 ادام (1858 وتباسى) كوشىپ، جوسپار 106 پايىزدىق كورسەتكىشپەن ورىندالدى.
ەسكە سالا كەتسەك، ەڭبەك رەسۋرستارىنىڭ ۇتقىرلىعىن ىنتالاندىرۋ ءۇشىن «ەڭبەك» ءونىمدى جۇمىسپەن قامتۋ جونىندەگى مەملەكەتتىك باعدارلاما بويىنشا ۇكىمەتتىڭ ايقىنداعان ايماقتارىنا ەرىكتى تۇردە قونىستانعان تۇلعالارعا مەملەكەتتىك قولداۋ شارالارى كوزدەلگەن.
«حالىقتىڭ كوشى-قونى تۋرالى» تۋرالى ق ر زاڭىنا سايكەس، قونىس اۋدارۋشىلاردىڭ الماتى، جامبىل، ماڭعىستاۋ، تۇركىستان، قىزىلوردا وبلىستارىنان كوشۋى كوزدەلگەن. ال قونىس اۋدارۋشىلاردى قابىلداۋ ايماقتارى رەتىندە شىعىس قازاقستان، قوستاناي، پاۆلودار، سولتۇستىك قازاقستان وبلىستارى بەلگىلەنگەن.
«ەرىكتى تۇردە قونىس اۋدارۋشىلارعا سۋبسيديا بەرىلەدى: ياعني ءاربىر وتباسى مۇشەسىنە 35 ا ە ك (88 مىڭ تەڭگە) كولەمىندەگى ءبىرجولعى تولەم جانە تۇرمىستىق ءۇي-كوممۋنالدىق تولەمدەردىڭ قۇنىن اي سايىن تولەۋ ءۇشىن وتباسىنا 12 اي ىشىندە 15 تەن 30 ا ە ك- كە دەيىن (39 مىڭنان 76 مىڭ تەڭگەگە دەيىن) تولەنەدى.
بۇدان باسقا 2018-جىلدان باستاپ، جۇمىس بەرۋشىلەرگە جۇمىسقا تۇراقتى قابىلداعان ءاربىر جۇمىسشى ءۇشىن (كەمىندە 5 ادام) 450 ا ە ك (1136 مىڭ تەڭگە) مولشەرىندە سۋبسيديا بەرىلەدى. سونداي-اق كوشىپ كەلۋشىلەر مەن ورالماندار اراسىندا جاڭا بيزنەس-يدەيالاردى دامىتۋعا باعىتتالعان جاڭا تەتىك تە ىسكە قوسىلدى. باعدارلاما قاتىسۋشىلارىنا جاڭا بيزنەس-يدەيالاردى جۇزەگە اسىرۋ ءۇشىن 100 ا ە ك (252 مىڭ تەڭگە) كولەمىندە مەملەكەتتىك گرانتتار بەرىلۋدە»، - دەلىنگەن مينيسترلىكتىڭ حابارلاماسىندا.
مەملەكەت باسشىسىنىڭ تاپسىرماسىنا سايكەس، قونىس اۋدارۋشىلاردى تۇرعىن ۇيمەن قامتاماسىز ەتۋ ماسەلەلەرى دە قاراستىرىلعان. 2019-جىلدان باستاپ باعدارلاماعا جۇمىس بەرۋشىلەردىڭ قاتىسۋىمەن قونىس اۋدارعان ادامدار ءۇشىن تۇرعىن ءۇي سالۋ جانە ساتىپ الۋدىڭ جاڭا تەتىگى ەنگىزىلدى. سولتۇستىك قازاقستان وبلىسىندا پيلوتتىق جوبا جۇزەگە اسىرىلعاننان كەيىن قابىلداۋ مەحانيزمىن باسقا ايماقتارعا دا قولدانۋ جوسپارلانىپ وتىر. الداعى ءۇش جىلدا بۇل جاڭا تەتىك 3000 عا جۋىق قونىس اۋدارۋشىنى تۇرعىن ۇيمەن قامتاماسىز ەتەدى.
«تالداۋ جۇمىستارى كورسەتكەندەي، كوشىپ-قونۋشىلاردىڭ جارتىسىنان كوبى پاۆلودارعا (31 پايىز) ، شىعىس قازاقستانعا (27 پايىز)، سولتۇستىك قازاقستانعا (22 پايىز)، قوستاناي وبلىسىنا (16 پايىز) قونىستانعان.
ولاردىڭ باسىم بولىگى تۇركىستان وبلىسىنان (36 پايىز)، الماتىدان (28 پايىز)، جامبىلدان (15 پايىز)، قىزىلوردادان (13,5 پايىز)، ماڭعىستاۋ وبلىسىنان (2,7 پايىز) كوشكەن. قونىس اۋدارۋشىلاردىڭ 48 پايىزى نەمەسە 3665 ءى جۇمىس جاسىنداعى جاندار. ولاردىڭ ىشىندە 2020 ادام نەمەسە 70 پايىز جۇمىسپەن قامتىلدى. بۇدان باسقا، 180 ادام كاسىپكەرلىك قىزمەتپەن شۇعىلدانادى»، - دەپ حابارلايدى مينيسترلىكتەن.
