قازاقستاندا ستۋدەنتتەردىڭ جارتىسىنان استامى - قىزدار
بۇل تۋرالى ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنەن ءمالىم ەتتى، دەپ حابارلايدى قازاقپارات ءتىلشىسى.
ستۋدەنتتەردىڭ 53,9 پايىزى نەمەسە 292231 ءى قىزدار.
بيىل ستۋدەنتتەر سانى بىلتىرعىدان 9,3 پايىزعا كوبەيدى. ەلىمىز جوعارى وقۋ ورىندارىنا 2018/2019 وقۋ جىلىندا 163336 ادام قابىلداندى. بۇل رەتتە، 51779 ادام ءتۇرلى سەبەپتەرگە بايلانىستى وقۋ مەرزىمى اياقتالعانعا دەيىن شىعىپ كەتكەن.
ستۋدەنتتەردىڭ 73,6 پايىزى - كۇندىزگى بولىمدە، 19 پايىزى - سىرتقى، ال 7,4 پايىزى كەشكى بولىمدەردە ءبىلىم الادى. مەملەكەتتىك گرانت نەگىزىندە وقىپ جۇرگەندەر 162877، بۇل ستۋدەنتتەردىڭ جالپى سانىنىڭ 30 پايىزىن قۇرايدى. ال اقىلى بولىمدە وقيتىندار سانى - 379581، ياعني 70 پايىزى. مەملەكەتتىك تىلدە ستۋدەنتتەردىڭ - 64,5 پايىزى، ورىس تىلىندە - 31 پايىزى، اعىلشىن تىلىندە 4,5 پايىزى ءبىلىم الادى.
130691 بىلىكتى مامان وقۋدى بىتىرگەن، بۇل 2017/2018 وقۋ جىلىمەن (127084) سالىستىرعاندا 2,8 پايىزعا كوپ.
شتاتتاعى پروفەسسور-وقىتۋشىلاردىڭ جالپى سانى 38275 ادام، ولاردىڭ 5630 ى قوسىمشا جۇمىس ىستەيدى. پروفەسسور-وقىتۋشىلاردىڭ 8,4 پايىزى - عىلىم دوكتورى، 33,7 پايىزى - عىلىم كانديداتى، 6 پايىزى - پروفەسسور، 14,8 پايىزى دوتسەنت اتاعىنا يە. ماگيستر دارەجەسىنە يە وقىتۋشىلار سانى - 12337 نەمەسە 32,2 پايىزى، فيلوسوفيا دوكتورلارى (PhD) - 2379 نەمەسە 6,2 پايىزى.
قازاقستانداعى ج و و سانى، فيليالدارىن قوسا ەسەپتەگەندە، 2018/2019 وقۋ جىلىنىڭ باسىندا 128 بولدى. سونىڭ 45 ءى - مەملەكەتتىك، 79 ى جەكەمەنشىك، 4 ءى شەتەلدىك جوعارى وقۋ ورنى.
