قازاقستاندا تۇقىم وندىرەتىن ەكى عىلىمي ورتالىق سالىنادى

استانا. قازاقپارات - قازاقستاندا جۇگەرى، سويا جانە ارپانىڭ ساپالى تۇقىمدارى تاپشى.

بۇل تۋرالى KazSeed كاسىپورنىنىڭ باس ديرەكتورى الماس تاتىشەۆ ءمالىم ەتتى، دەپ حابارلايدى قازاقپارات ءتىلشىسى.

الماس تاتىشەۆتىڭ ايتۋىنشا، وسى ماسەلەنى شەشۋ ءۇشىن 2019 -جىلى ەكى عىلىمي ورتالىقتىڭ قۇرىلىسى باستالادى. ولار 2020 -جىلى پايدالانۋعا بەرىلەدى.

«قازاقستاننىڭ وڭتۇستىگى مەن سولتۇستىگىندە تۇقىم وندىرۋگە ارنالعان ەكى عىلىمي ورتالىق اشۋ جوسپارلانعان. عىلىمي ورتالىقتاردا ەلىمىزدىڭ ءار وڭىرىنە بەيىمدەلگەن تۇقىمدار شىعارىلادى. ويتكەنى ءار جەردىڭ توپىراعى مەن ميكروفلوراسى، بۋناقدەنەلىلەرى دە، سۋى دا ءارتۇرلى بولادى»، - دەدى ول.

كاسىپورىن باسشىسىنىڭ سوزىنشە، وندىرىلگەن تۇقىمنىڭ %10 عىلىمي ورتالىقتاردىڭ ءوز قاجەتتىلىگىنە قالدىرىلىپ، %90 قازاقستاندا، سونداي-اق ەۋروپا، ازيا ەلدەرىندە ساتىلادى.

بۇدان تىس، ول امەريكالىقتارمەن بىرلەسە سالىناتىن قۇرامىندا گ م و جوق جۇگەرى جانە سويا تۇقىمدارىن وندىرەتىن زاۋىتتىڭ قۇرىلىسى تۋرالى ايتتى.

«ءبىز تۇقىم ءوندىرۋ سالاسىنا امەريكالىقتاردىڭ تاجىريبەسىن ەنگىزىپ جاتىرمىز. بىرىككەن كاسىپورىن سالىپ، تەحنولوگيا جانە تاجىريبە الماسامىز. زاۋىت جىلىنا 25 مىڭ توننا تۇقىم بەرەتىن ءوندىرىس قۋاتىنا يە بولادى. بۇل، قازاقستان فەرمەرلەرىنە 1 ميلليون گەكتارعا تۇقىم سەبۋ مۇمكىندىگىن بەرەدى»، - الماس تاتىشەۆ.

ونىڭ ايتۋىنشا، تۇقىمعا گ م و قوسپاۋ مۇمكىندىگى قاراپايىم سەلەكسيا ءادىسىنىڭ ارقاسىندا مۇمكىن بولعان.

اۆتورى: كاميلا ءامىروۆا