توي قوناقتارىنا قانداي سىي بەرگەن دۇرىس؟

 استانا. قازاقپارات - تويدا تاراتىلاتىن «تويباستار» كەلگەن قوناققا دا وسىنداي قۋانىش جۇعىستى بولسىن دەگەن نيەتپەن بەرىلەدى.

ولار ءسىزدىڭ قۋانىشىڭىزبەن بولىسۋگە كەلىپ وتىرعان سوڭ، ولارعا دا قۋانىشتى كۇننەن ءبىر ەستەلىك، ءبىر بەلگى بەرگەنىڭىز ءجون.

توي سوڭىندا كەلەسى تويدىڭ باستاۋى رەتىندە «تويباستار» تاراتىلادى. ءار داستارحانعا سەبەتكە نە كيىز ۇيگە، بولماسا ۇلتتىق ويۋلارمەن بەزەندىرىلگەن قاپشىقتارعا سالىنىپ بەرىلەدى. ىشىنە كىشكەنتاي كيىز ءۇي، قامشى، ورامال، شاي، قوراپشاداعى كامپيت، تاقيا، سىرعا، ساقينا سەكىلدى زاتتار سىي رەتىندە سالىناتىن. داستارحان باسىنداعى قوناقتار كوڭىلدەرىنە ۇناعان نە كوزىنە تۇسكەن سىيدى ءىلىپ الادى. وسى سىيلىقتارعا التەرناتيۆتى قانداي زاتتار كىرەدى ەكەن؟

1. بونبونەركا -  ادەمى قوراپ

قازىرگى تاڭدا تويدا بونبونەركا دەپ اتالاتىن كىشكەنتاي قوراپتار ترەندكە ەنىپ كەلەدى. ونىڭ ىشىندە كىشكەنتاي كامپيتتەر مەن شوكولادتار، جاڭعاقتار، شاي سالىنادى. نەگىزىندە مۇنداي قوراپشالاردى جاس جۇبايلاردىڭ سۋرەتىمەن، ەسىمى مەن توي كۇنىن جازىپ، باسپادان شىعارادى. بونبونەركانى قوناقتىڭ تارەلكەسىنە قويۋعا بولادى. بونبونەركانىڭ ءتۇسى، كولەمى جانە بەزەندىرىلۋى توي يەسىنىڭ قالاۋىمەن دايىندالادى. باستىسى، بارلىق بونبونەركانىڭ ءتۇر- ءتۇسى، ىشىندەگى سىيلىقتارى بىردەي بولۋىن قاداعالاۋ كەرەك.

2. جاس جۇبايدىڭ سۋرەتى بەينەلەنگەن نە ەسىمدەرى مەن توي كۇنى جازىلعان ماگنيت جاپسىرمالارى

جۇبايلاردىڭ ادەمى سۋرەتى، ەسىمدەرى، توي كۇنى مەن «سىزگە دە باقىت تىلەيمىز!» دەگەن جازۋ كەلگەن قوناعىڭىزدىڭ ۇيىندە، اسىرەسە توڭازىتقىشتارىندا تۇرادى. كەلگەن قوناقتىڭ تارەلكەسىنىڭ استىنا قويىپ، توسىنسىي رەتىندە ۇسىنساڭىزدار بولادى. بولماسا، لوتورەيا ويىنىن ويناتىپ، باعى جانعان قوناعىڭىزعا سىيعا بەرىڭىز.

3. قولدان جاسالعان سابىن

كۇلكىلى كورىنۋى مۇمكىن، ءبىراق، قولدان جاسالعان سىيدىڭ قۇنى جوعارى بولادى. جۇبايلاردىڭ ينيتسيالى جازىلعان حوش ءيىستى سابىن اركىمگە ۇنايتىنى ءمالىم.

4. ەرەكشە بەزەندىرىلگەن سىرىڭكە

وتباسى -  وشاق قاسى. وشاقتى سىرىڭكەمەن تۇتاتادى. وسىنى سەبەپ قىلىپ، قوناقتارىڭىزعا سۋرەتتەرىڭىز بەن توي كۇنىن بەينەلەگەن سىرىڭكە سىيعا تارتىڭىز. ەستە قالارلىق سىي بولۋى مۇمكىن.

5. گۇلدەردىڭ ءدانى

«بولاشاققا ۇرپاق سىيلايمىز» دەگەن نيەتپەن بەرىلگەن سىي بولماق. جايقالىپ وسەتىن گۇلدەردىڭ ءدانىن قالتاشالارعا سالىپ ۇلەستىرسەڭىز، تازا ەكولوگيالىق سىي دەپ تۇسىنەدى.

6. شوكولاد

ءتۇسى ادەمى قاعازعا جۇبايلاردىڭ ەسىمىن جازىپ، قاراپايىم شوكولادتاردىڭ سىرتىن وراپ، بانتيكپەن ساندەسەڭىز، جاراسىپ- اق كەتەدى. بۇل ءادىس قازىردىڭ وزىندە سانگە اينالعان.

7. شىنى قۇتىلارعا قۇيىلعان بال نەمەسە توساپ

ءتاتتى سەزىمنىڭ سيمۆولى رەتىندە تاپتىرماس سىيلىق. شاقىرعان قوناقتاردىڭ سانى از بولسا، قولدان جاساپ، شىن جۇرەكپەن سىيلاعان دۇرىس.

8. كۇنتىزبە

قۋانىشتى كۇندى بەلگىلەپ، قاراسا كوز تويمايتىن سۋرەتتەرمەن ەستەن كەتپەس كۇنتىزبە جاساۋعا بولادى. تويدىڭ كرەاتيۆتى جاڭالىعى بولارى ءسوزسىز.