سۋديالار ءوز شەشىمدەرىنە جاۋاپ بەرەتىن بولادى - جوعارعى سوت ءتوراعاسى

 استانا. قازاقپارات - جوعارعى سوت ءتوراعاسى جاقىپ اسانوۆ بيىل سوت شەشىمدەرىنىڭ ساپاسىنا ەكپىن قويىلاتىنىن ءمالىم ەتتى، دەپ حابارلايدى قازاقپارات ءتىلشىسى.

«وزدەرىڭىز كوردىڭىزدەر، ەلباسى ءبىزدىڭ بۇكىل پروبلەمالارعا قاراپ، سوت جۇيەسىنە ۇلكەن قامقور كورسەتتى. ءبىز جۇمىستىڭ قيىندىعىن، جۇكتەمەنىڭ كوپتىگىن ايتتىق. بۇل تۇرعىدا پرەزيدەنت وسى ماسەلەنى شەشىپ، وتكەن اپتادا ءتيىستى زاڭعا قول قويدى. بۇل قۇجات ەندى جاقىن ارادا كۇشىنە ەنەدى. سونىمەن قاتار، الەۋمەتتىك جاعىنان قورعالۋىمىز تومەن ەكەنىن دە بايانداعان بولاتىنبىز. وسى ماسەلەگە دە قاتىستى وڭتايلى شەشىم جاسالدى. ال ەندى الاڭداماي، ناتيجەلى جۇمىس ىستەۋ ءۇشىن بىزگە بارلىق جاعداي جاسالىپ جاتىر. قازىر ءبىراز وڭىردە جاڭا عيماراتتار سالىنۋدا. سايكەسىنشە، وسىنىڭ بارلىعىنا سۇراۋ بولادى. بۇل دەگەنىمىز، ءار سۋديا ءوزىنىڭ جەكە شەشىمىنە جاۋاپ بەرەتىنى تۇسىنىكتى. ياعني وسى ايتقانىم قۇر ءسوز ەمەس» ، - دەدى ج. اسانوۆ سوت جۇيەسىنىڭ 2018 -جىلعى جۇمىسىنىڭ قورىتىندىسىنا ارنالعان كەڭەيتىلگەن وتىرىستا.

وسى ورايدا ول بيىل سوت شەشىمدەرىنىڭ ساپاسىنا ەكپىن قويىلاتىنىن اتاپ ءوتتى.

«بۇگىنگى وتىرىستا ىشكى قاۋىپسىزدىك قىزمەتىنىڭ باسشىسى بايانداما جاسايدى. سول كەزدە ءبىزدىڭ سۋديالارعا قاتىستى مالىمەتتەر ايتىلادى، ولاردىڭ جاساپ جاتقان تىرشىلىكتەرىن كورەسىزدەر. بىزگە وسىندا كوپ جاعدايلار بەلگىلى. قازىرگى كەزدە ىشكى قاۋىپسىزدىك ءتيىستى قۇقىققورعاۋ ورگاندارىمەن وتە تىڭعىلىقتى جۇمىستاردى اتقارۋدا» ، - دەپ اتاپ ءوتتى جوعارعى سوت ءتوراعاسى.

بۇدان بۇرىن حابارلانعانداي، جاقىپ اسانوۆ بۇگىنگى وتىرىستا دۇرىس ۇكىم شىعارماعان سۋديالاردى جازالاۋ ماسەلەسىن كوتەردى.

 سونىمەن قاتار، 2018 -جىلى قازاقستاندا قىلمىستىق ىستەردىڭ ۇشتەن ءبىرى تاراپتاردىڭ تاتۋلاسۋىمەن اياقتالعانى ءمالىم بولدى.