سۋديالار ساپاسىز جۇمىستارى ءۇشىن نەگە جازالانبايدى؟
«سۋديا تاراپىنان ورەسكەل قاتەلىككە جول بەرىلگەنى تۋرالى كاسساتسيالىق ينستانتسيا قاۋلىسىندا اتاپ وتىلگەن جاعدايدا عانا ءبىز بۇل سۋديانى جاۋاپكەرشىلىككە تارتا الامىز. بۇل تۇرعىدا قاعيدا تۇرىندە ارەكەت جاسالماعاندىقتان، جەرگىلىكتى جەرلەردە ساپاسىز سوت تورەلىگىنە ۇرىندىرامىز. كەيىننەن سوت شەشىمىنىڭ كۇشىن جويعان كەزدە نەمەسە وزگەرتكەن جاعدايدا عانا ءوزىمىزدىڭ مىندەتىمىز ورىندالدى دەپ سانايمىز. بۇدان كەيىن نە بولادى؟ نەگە سۋديا قىزمەتىنە قاتىستى ماسەلە توتەسىنەن قويىلمايدى؟ نەگە ادامداردىڭ جوعارعى سوتقا بارۋىنا ءماجبۇر ەتەمىز»، - دەدى ول سوت جۇيەسىنىڭ 2018-جىلعى جۇمىسىنىڭ قورىتىندىسىنا ارنالعان كەڭەيتىلگەن وتىرىستا.
ج. اسانوۆتىڭ پايىمىنشا، جەرگىلىكتى جەرلەردە سۋديالار وزدەرىنىڭ شەشىمدەرىنە جاۋاپ بەرمەگەندىكتەن، جاۋاپسىزدىقتى سەزىنىپ وتىر.
«ادامدار سۋديانىڭ نەلىكتەن جاۋاپكەرشىلىككە تارتىلماعاندىعى تۋرالى ءتوراعادان سۇراپ جاتادى. كاسساتسيالىق القا قاۋلىسىندا سۋديا ورەسكەل قاتەلىك جىبەرگەنى نەمەسە جىبەرمەگەنى جايىندا اتاپ كورسەتىلمەيدى. ءبىز بۇل تۋرالى ۇندەمەيمىز. سوندىقتان بىزدە كاسساتسيالىق ينستانتسيالارعا جۇزدەگەن شاعىم ءتۇسىپ جاتادى»، - دەدى ول.
