سەنات كاسپيدىڭ قۇقىقتىق مارتەبەسىنە قاتىستى زاڭدى قابىلدادى

استانا. قازاقپارات - بۇگىن پارلامەنت سەناتىنىڭ جالپى وتىرىسىندا «كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانى راتيفيكاتسيالاۋ تۋرالى» زاڭى قابىلداندى، دەپ حابارلايدى قازاقپارات.

كونۆەنتسياعا 2018-جىلعى 12- تامىزدا اقتاۋ قالاسىندا قازاقستان، ازەربايجان، يران، رەسەي جانە تۇرىكمەنستان پرەزيدەنتتەرى قول قويعان بولاتىن.

«قازاقستان پرەزيدەنتى نۇرسۇلتان نازاربايەۆ «كاسپي تەڭىزىنىڭ كونستيتۋتسياسى» دەپ اتاعان بۇل قۇجات جاعالاۋ مەملەكەتتەرى اراسىنداعى 20 جىلدان استام ۋاقىتقا سوزىلعان كۇردەلى كەلىسسوزدەر پروتسەسىنىڭ ناتيجەسى بولىپ وتىر. كاسپي كەللىسوزدەرى اياسىندا جوعارى دەڭگەيدە بەس كەزدەسۋ، سىرتقى ىستەر مينيسترلەرىنىڭ 7 وتىرىسى، كونۆەنتسيانى ازىرلەۋ بويىنشا ارنايى جۇمىس توبىنىڭ 52 وتىرىسى، سونداي-اق ءارتۇرلى فورماتتاردا دا كەزدەسۋلەر ءوتتى»، - دەدى سىرتقى ىستەر ءمينيسترى بەيبىت اتامقۇلوۆ.

ونىڭ سوزىنە قاراعاندا، كاسپي تەڭىزىنىڭ قۇقىقتىق ماتەربەسىنىڭ رەتتەلۋى كوپتەگەن جىلدار بويى جاعالاۋماڭى مەملەكەتتەرى سىرتقى ساياساتىنىڭ ستراتەگيالىق باعىتتارىنىڭ اراسىندا نەگىزگىلەرىنىڭ ءبىرى بولدى.

«1997-جىلى قازاقستان كاسپي تەڭىزىنىڭ قۇقىقتىق مارتەبەسىنە قاتىستى ءوزىنىڭ ۇستانىمىن ب ۇ ۇ- نىڭ رەسمي قۇجاتى رەتىندە جاريالادى. تاريح كورسەتىپ وتىرعانداي، ەلىمىز 20 جىل بۇرىن مالىمدەگەن تاسىلدەمەلەر دۇرىس جانە ولار بارلىق جاعالاۋ مەملەكەتتەرى ءۇشىن نەعۇرلىم وڭتايلى ەكەنى دالەلدەندى. مىنە، سول ۇستانىمدار 2018-جىلى اقتاۋ قالاسىندا قول قويىلعان كونۆەنتسيادا كورىنىس تاۋىپ وتىر»، - دەدى ۆەدومستۆو باسشىسى.

بۇدان بۇرىن حابارلانعانداي، كاسپي تەڭىزىنىڭ قۇقىقتىق مارتەبەسى بويىنشا ماسەلەلەر تاراپتاردىڭ ايرىقشا قۇزىرەتىنە جاتادى.

مەملەكەتتەردىڭ ەگەمەندىگىن، اۋماقتىق تۇتاستىعىن، تاۋەلسىزدىگىن، ەگەمەندىك تەڭدىگىن قۇرمەتتەۋ، كۇش نەمەسە كۇشپەن قورقىتۋدى قولدانباۋ، ءوزارا قۇرمەت، ىنتىماقتاستىق، ءبىر-ءبىرىنىڭ ىشكى ىستەرىنە ارالاسپاۋ سەكىلدى قاعيدالار نەگىزىندە جۇزەگە اسىرالاتىن بولادى. كاسپي تەڭىزىنىڭ اكۆاتورياسى ءارتۇرلى قۇقىقتىق رەجىمدەردە بولاتىن ىشكى سۋلار، اۋماقتىق سۋلار، بالىق اۋلاۋ ايماقتارى جانە ورتاق سۋ كەڭىستىگى بەلگىلەندى. اۋماقتىق سۋلار ەنى 15 تەڭىز ميلىنەن اسپايدى. ال ولاردىڭ سىرتقى سۋلارى تەڭىزدەگى مەملەكەتتىك شەكارالار بولىپ بەكىتىلدى.

ءوز كەزەگىندە سەنات ءتوراعاسى قاسىم-جومارت توقايەۆ كونۆەنتسيا وتە ماڭىزدى قۇجات ەكەنىن اتاپ ءوتتى.

«راسىندا دا بۇل وتە ماڭىزدى قۇجات. سىرتقى ىستەر مينيسترلىگى 20 جىل بويى كەلىسسوزدەر جۇرگىزدى. وسى ورايدا 5 مەملەكەت وڭ ناتيجەگە قول جەتكىزدى. سوندىقتان بۇنى تاريحي وقيعا دەپ ەش كۇمانسىز ايتۋعا بولادى»، - دەدى ق. توقايەۆ.