فۋتبول: الماتىلىق «قايرات» تۇركيادا رەسەيلىك كوماندادان باسىم ءتۇستى

الماتى. قازاقپارات - الماتىلىق «قايرات» فۋتبول كومانداسى تۋركياداعى وقۋ-جاتتىعۋ اياسىنداعى العاشقى كەزدەسۋىن وتكىزدى، دەپ حابارلايدى قازاقپارات ءتىلشىسى.

ونىڭ قارسىلاسى رەسەي چەمپيوناتىنىڭ ءۇشىنشى ديۆيزيونىندا ونەر كورسەتەتىن چايكا كومانداسى بولدى.

بۇل كەزدەسۋدە ەسەپتى ءبىرىنشى بولىپ 30-مينۋتتا رەسەيلىك الەكساندر پودبەلتسيەۆ اشتى. ارتىنشا، ەكىنشى تايىمنىڭ العاشقى 15- مينۋتىندا قايرات ويىنشىلارى قاتارىنان ءۇش گول سوعىپ، ويىندى جەڭىسپەن اياقتادى. الماتىلىقتار ساپىنان ادەرينسولا ەسەولا دۋبلمەن جانە رادە دۋگاليچ ءبىر گولمەن كوزگە ءتۇستى.

ايتا كەتۋ كەرەك، بۇل «قايرات» كلۋبىنىڭ باپكەرى الەكسەي شپيليەۆسكيدىڭ العاشقى جەڭىسى بولىپ سانالادى. 30 جاسار رەسەيلىك مامان كوماندانى 2018-جىلدىڭ قاراشاسىنان باستاپ جاتتىقتىرادى.