نۇرسۇلتان نازاربايەۆ ۇكىمەت مۇشەلەرىن ورىندارىنان تۇرعىزدى

استانا. قازاقپارات - بۇگىن ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ پروتوكولدى بۇزىپ، ۇستەلدىڭ تومەن جاعىنا جايعاسقان قارجى ءمينيسترىن جوعارى وتىرعىزدى، دەپ حابارلايدى قازاقپارات ءتىلشىسى.

 «سالىق- بيۋدجەت ساياساتىندا اۋقىمدى جۇمىستار اتقارىلىپ جاتىر. دەگەنمەن، كولەڭكەلى ەكونوميكا كۇرەس ءالسىز جۇرگىزىلىپ وتىر. ماسەلەن، ءبىزدىڭ كەدەنشىلەردىڭ يمپورت كورسەتكىشتەرى قىتاي تاراپىنىڭ مالىمەتتەرىنەن ءبىرشاما ايىرماشىلىعى بار. مىندەت - الداعى ءۇش جىلدا كولەڭكەلى ەكونوميكا كولەمىن كەمىندە 40 پايىزعا قىسقارتۋ»، - دەپ اتاپ وتكەن ەلباسى وسى ماسەلەگە وراي، قارجى ءمينيسترى ءاليحان سمايىلوۆتى ورنىنان تۇرعىزدى. الايدا قارجى ءمينيسترىنىڭ ۇستەلدىڭ سوڭىندا وتىرۋى مەملەكەت باسشىسىنىڭ اشۋىن تۋعىزدى.

 «باقىتجان (ۇكىمەت باسشىسى ساعىنتايەۆ)، قارجى ءمينيسترى ۇستەلدىڭ سوڭىندا ەمەس، ۆيتسە- پرەمەرلەردەن كەيىن وتىرۋى ءتيىس. ورنى سول جەردە. ادەتتە قارجى ءمينيسترى پرەمەر- ءمينيستردىڭ ورىنباسارى بولادى. ال قاراشى سەن قايدا وتىرعىزعانسىڭ؟ پروتوكولدى كىم جاسادى؟ مەن قازىر پروتوكولدى بۇزامىن»، - دەگەن نۇرسۇلتان نازاربايەۆ قارجى ءمينيسترىن جوعارى وتىرۋعا شاقىردى.

 «قوجامجاروۆتان (باس پروكۋرور) باستاپ ءبارىڭ ءبىر ورىنعا جىلجىڭدار»، - دەپ بۇيىردى نۇرسۇلتان نازاربايەۆ.

وسىدان كەيىن قارجى ءمينيسترى ۇكىمەت باسشىسىنىڭ ورىنباسارى ەربولات دوسايەۆ پەن قايرات قوجامجاروۆتىڭ اراسىنداعى بوساعان ورىنعا كەلدى.

«مىنە، ونىڭ ورنى. بۇل قارجى ءمينيسترى. وسىنداي قارىم- قاتىناسىمىز بولعاندىقتان قارجى سالامىز اقساپ تۇر»، - دەدى ەلباسى.

اۆتور: مارلان جيەمباي