قازاقستانداعى ءالسىز بانكتەردى جابۋ پروتسەسى اياقتالىپ قالدى - ۇلتتىق بانك ءتوراعاسى

استانا. قازاقپارات - ق ر ۇلتتىق بانكىنىڭ ءتوراعاسى دانيار اقىشەۆ «حالىق بانك» پەن «قازكوممەرتس بانكتىڭ» بىرىگۋ پروتسەسىنە قالىپتى جاعداي دەپ باعا بەردى.

بۇل تۋرالى ۇلتتىق بانك ءتوراعاسى ق ر پرەزيدەنتى نۇرسۇلتان نازاربايەۆتىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا ءمالىم ەتتى، دەپ حابارلايدى قازاقپارات ءتىلشىسى.

«بانك سەكتورىنداعى ايتۋلى وقيعالاردىڭ ءبىرى - «حالىق بانك» پەن «قازكوممەرتس بانكتىڭ» بىرىگۋى ەكەنى انىق. «حالىق بانك» قازىرگى ۋاقىتتا ەلىمىزدەگى بانك سەكتورىنا تيەسىلى اكتيۆتەردىڭ 34 پايىزىنا يە. بۇل - قالىپتى جاعداي. الەمنىڭ كوپتەگەن مەملەكەتتەرىندە، ماسەلەن ۇلى بريتانيا، يتاليا، شۆەيتساريا، فرانسيا، رەسەيدە بۇكىل نارىقتىڭ 30 پايىزىنا يە ءىرى بانكتەر بارشىلىق»، - دەدى دانيار اقىشەۆ.

ۇلتتىق بانك ءتوراعاسى قازاقستاندا ىشكى جانە سىرتقى نارىقتا شەتەلدىك ويىنشىلارمەن باسەكەلەسە الاتىنداي ءىرى قارجىلىق ينستيتۋت بولۋى كەرەكتىگىن اتاپ ءوتتى.

«وتكەن جىلى نارىقتان ءالسىز ويىنشىلاردى ىسىرۋ جۇمىسى جالعاسىن تاپتى. تاۋەكەلگە بارۋ قاۋپى جوعارى ءۇش بانك ليتسەنزيادان ايىرىلدى. بۇل بانكتەردى جابۋ پروتسەسى شەگىنە جەتىپ قالدى. قازىردىڭ وزىندە دەپوزيتتەردى كەپىلدەندىرۋ جۇيەسىنەن تولەمدەر جۇرگىزىلىپ جاتىر. بۇنىڭ ءبارى ەشقانداي بيۋروكراتياسىز، زاڭنامالىق تۇرعىدا ءارى بارىنشا جىلدام، ازاماتتار ءۇشىن ىڭعايلى جاعدايدا جۇرگىزىلۋدە»، - دەدى دانيار اقىشەۆ.

ەسكە سالا كەتسەك، ۇكىمەت ۇيىندە ق ر پرەزيدەنتى نۇرسۇلتان نازاربايەۆتىڭ توراعالىعىمەن ۇكىمەتتىڭ كەڭەيتىلگەن قۇرامداعى وتىرىسى ءوتىپ جاتىر. ەلباسىنىڭ قاتىسۋىمەن ۇكىمەتتىڭ مۇنداي وتىرىسى جىل باسىندا تۇراقتى تۇردە وتكىزىلەدى. بۇگىنگى جيىنعا ۇكىمەت مۇشەلەرى، استانا، الماتى جانە شىمكەنت قالالارى مەن وبلىستاردىڭ اكىمدەرى، ورتالىق مەملەكەتتىك ورگاندار مەن مينيسترلىكتەر باسشىلارى قاتىسۋدا.