نۇرسۇلتان نازاربايەۆ سۋارمالى ەگىستىك جەرلەرىن ارتتىرۋدى جۇكتەدى

استانا. قازاقپارات - بۇگىن ۇكىمەتتىڭ كەڭەيتىلگەن قۇرامداعى وتىرىسىندا ەلباسى نۇرسۇلتان نازاربايەۆ سۋارمالى ەگىس القاپتارىنىڭ اۋماعىن ارتتىرۋدى جۇكتەدى، دەپ حابارلايدى قازاقپارات.

وتىرىس بارىسىندا ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ ەلىمىزدىڭ سولتۇستىك وڭىرلەرىندە سۋارمالى جەرلەردى كوبەيتۋگە قاتىستى شارالار ىسكە اسىرىلاتىنىن باياندادى.

وسى رەتتە ەلباسى كوكتەمدە ەرىگەن قار سۋى ءبىرقاتار وبلىستا جايىلىپ كەتەتىنىن، بۇل تۇرعىدا سۋ جينايتىن نىساندار سالۋ كەرەكتىگىن تاپسىردى.

«كەزىندە ەلىمىز ايماعىندا قۇدىقتار سانى كوپ بولدى، ءار قۇدىقتىڭ توڭىرەگىندە وتار-وتار قوي وسىرىلەتىن. وسى باعىتتاعى جۇمىستاردى قولعا الۋ كەرەك. جالپى، اۋىل شارۋاشىلىعى ءونىمىن ارتتىرۋعا سۋارمالى ەگىستىكتەردىڭ ۇلەسى مول بولادى»، - دەدى ن. نازاربايەۆ.

وسى ورايدا ءومىرزاق شوكەيەۆ قۇدىقتاردىڭ اينالىسىندا مال شارۋاشىلىعىن دامىتۋ شارالارى ىسكە اسىرىلاتىنىن اتاپ ءوتتى.

«قازىر بۇل نىسانداردى قالپىنا كەلتىرىپ جاتىرمىز. بىزدەگى ۇلكەن رەزەرۆ مال شارۋاشىلىعىندا جاتىر. 1 ميلليون توننا ءبيدايدى ساتساق، 150 ميلليون دوللار تابىس الامىز. ال ءىرى قارا مال ەتىن وتكىزگەن كەزدە 1 ميلليارد دوللار شىعارۋعا بولادى. تاۋىق جۇمىرتقاسىنىڭ ءوزى ءبيدايدان ءۇش ەسە ارتىق تابىس اكەلەدى»، - دەدى اۋىل شارۋاشىلىعى ءمينيسترى.

پرەزيدەنت اۋىل شارۋاشىلىعى ونىمدەرىن ءوندىرۋدىڭ ءتيىمدى باعىتتارىن تىڭعىلىقتى پىسىقتاۋ قاجەتتىگىن جۇكتەدى.

«ءبىزدىڭ ءبيدايدى ەكسپورتتايتىن نارىقتار الىستا ورنالاسقان. ەلىمىزدە كوكتەمدە ءبيدايدى سەۋىپ تاستايدى دا، كۇزدە ورىپ الادى. سودان كەيىن قىس بويى شالقايىپ وتىرادى. وسى تۇرعىدا تىنىمسىز جۇمىس ىستەپ جاتىرمىز دەپ ويلايدى. ياعني شارۋاشىلىقتاعى ونىمدىلىكتى ارتتىرۋدى ويلامايدى»، - دەدى ەلباسى.

سونداي-اق، بۇگىن ۇكىمەتتىڭ كەڭەيتىلگەن قۇرامداعى وتىرىسىندا ەلباسى نۇرسۇلتان نازاربايەۆ اۋىل شارۋاشىلىعى سالاسىنا بارلىق قاجەتتى قاراجاتتى ءبولۋدى تاپسىردى.

«اۋىل شارۋاشىلىعى سالاسى بولاشاقتا ەكونوميكانى دامىتۋدىڭ نەگىزگى درايۆەرى بولاتىنىن ۇنەمى ايتىپ ءجۇرمىز. بارلىق ەلدەر وزدەرىنىڭ جەرلەرىن يگەرىپ بولدى. وسى ورايدا، تەحنولوگيالىق جەتىستىكتەردىڭ ەڭ جوعارى شىڭىنا شىقتى. ەندى ولار (ەگىستىكتەرىندە) بۇدان جوعارى وندىرە المايدى. دۇنيەجۇزىندە قالعان جەر (يگەرۋگە بولاتىن) قازاقستان، رەسەي، ۋكراينادا قالدى»، - دەپ توقتالدى ەلباسى.

وسى ورايدا پرەزيدەنت ەلدەگى اۋىل شارۋاشىلىعى جەرلەرىن ءتيىمدى پايدالانۋ قاجەتتىگىن اتاپ ءوتتى.

«ەگەر دە بارلىق ەلدەر اقش- تاعى سەكىلدى ازىق-تۇلىكتى كوبىرەك تۇتىناتىن بولسا، الەمدەگى ازىق-تۇلىك 2,5 ميلليارد ادامعا عانا جەتەدى. 2040-جىلى جەر بەتىندە 8,9 ميلليارد حالىق بولادى. سوندىقتان اۋىل شارۋاشىلىعى ونىمدەرىنە سۇرانىستىڭ ارتۋىنا بايلانىستى بارلىعى بىزگە كەلەدى. وسى ۇردىستەرگە دايىندالۋ كەرەك. اۋىل شارۋاشىلىعى سالاسىنىڭ الەۋەتىنە جەكەلەي قاراۋ قاجەت. قانشا قارجى كەرەك بولسا، سونى بەرەيىك. ءبىراق ناقتى ناتيجەگە قول جەتكىزۋ كەرەك»، - دەدى مەملەكەت باسشىسى ق ر پرەمەر-ءمينيسترى باقىتجان ساعىنتايەۆقا قاراتا ايتقان سوزىندە.