استانا، الماتى، شىمكەنت جاستارىنا مىڭ پاتەر سالۋ مامىردا باستالادى

«2018 -جىلى قۇرىلىس سالاسى تۇراقتى ءوسىم قارقىنىن كورسەتتى جانە 2017 -جىلعى دەڭگەيگە قاراعاندا 4,1 پايىز بولىپ، ەڭبەك ونىمدىلىگىنىڭ ءوسىمى 9 پايىزدى قۇرادى. تۇرعىن ءۇي قۇرىلىسىندا ينۆەستيتسيالار 8,1 پايىزعا ارتتى. بۇل 1,2 تريلليون تەڭگەنى قۇرايدى. «نۇرلى جەر» مەملەكەتتىك باعدارلاماسى بويىنشا مەملەكەتتىك قاراجاتتىڭ 1 تەڭگەسى كورسەتكىش رەتىندە بولا تۇرا، 6 تەڭگە جەكە ينۆەستيتسيالار تارتىلدى. رەكوردتىق 12,5 ميلليون شارشى مەتر تۇرعىن ءۇي پايدالانۋعا بەرىلدى. بۇل 2017 -جىلعى دەڭگەيدەن 12,1 پايىزعا جوعارى»، - دەدى جەڭىس قاسىمبەك.

 مينيستر دەرەگىنشە، 2018 -جىلى ءبىر تۇرعىنعا تۇرعىن ءۇيدى بەرۋ 0,68 شارشى مەتردى قۇرادى. بۇل ت م د ەلدەرىنىڭ ىشىندە ەڭ جوعارى كورسەتكىش. 113 مىڭنان استام وتباسىنىڭ تۇرعىن ءۇي جاعدايى جاقساردى، ونىڭ ىشىندە مەملەكەتتىك قاراجات ەسەبىنەن 14 مىڭنان استام وتباسى جالعا بەرىلەتىن جانە كرەديتتىك تۇرعىن ۇيمەن قامتاماسىز ەتىلدى. بارلىق وڭىرلەردە تۇرعىن ءۇيدى بەرۋ بويىنشا وڭ سەرپىن بايقالادى. بۇل رەتتە ەداۋىر ءوسىم ماڭعىستاۋ، اتىراۋ، تۇركىستان جانە جامبىل وبلىستارىندا ورىن الدى. «7-20-25» باعدارلاماسىن ءساتتى ىسكە اسىرۋ ءۇشىن ينجەنەرلىك كوممۋنيكاتسيالاردىڭ قۇرىلىسىن قارجىلاندىرۋ 100 ميلليارد تەڭگەگە دەيىن ارتتى.

«ءسىزدىڭ استانا، الماتى جانە شىمكەنت قالالارىندا جۇمىس ىستەيتىن جاستارعا جىل سايىن كەمىندە 1 مىڭ جالعا بەرىلەتىن پاتەرلەردى سالۋ بويىنشا تاپسىرماڭىزدى ورىنداۋ ءۇشىن قارجىلاندىرۋدىڭ تەتىكتەرى مەن كوزدەرى ايقىندالدى. مامىر ايىنان باستاپ اكىمدىكتەرمەن بىرگە بۇل باعدارلامانى قارقىندى جۇزەگە اسىرا باستايتىن بولامىز. جالپى 2019 -جىلى 13 ميلليون شارشى مەتر تۇرعىن ءۇيدى سالۋدى جوسپارلاۋدامىز. ونىڭ ارقاسىندا شامامەن 118 مىڭ وتباسى تۇرعىن ۇيمەن قامتاماسىز ەتىلەدى»، - دەدى ول.

ونىڭ اتاپ وتۋىنشە، بارلىق قابىلدانعان شارالار نىسانالى ينديكاتورلاردى - 2030 -جىلعا دەيىن ءبىر ادامعا 30 شارشى مەترگە دەيىن ورىنداۋعا باعىتتالعان.

اۆتور: مارلان جيەمباي