كەلەر جىلى تەگىن ەمدەلۋگە بولىنەتىن قارجى كولەمى ۇلعايادى
«ۇستىمىزدەگى جىلى كەپىلدەندىرىلگەن تەگىن مەديتسينالىق كومەك كورسەتۋ ماقساتىندا مەملەكەت تاراپىنان 970 ميلليارد تەڭگە بولىنەدى. ال 2020-جىلى اتالعان باعىتقا بولىنەتىن قارجى كولەمى بيىلعىدان %16,6 ارتىپ، ياعني 1 تريلليون 134 ميلليارد تەڭگەنى قۇرايدى. كەپىلدەندىرىلگەن مەديتسينالىق كومەكپەن الدىمەن بالالار، جۇكتى ايەلدەر، زەينەتكەرلەر مەن مۇمكىندىگى شەكتەۋلى جاندار جانە تاعى باسقالار قامتىلادى. ول دەگەنىمىز جوبامەن 10 ميلليون قازاقستاندىق»، - دەلىنگەن اتالمىش قوردىڭ فەيسبۋكتەگى پاراقشاسىندا.
سونىمەن قاتار، بارلىق ازاماتتار ءۇشىن جەدەل جاردەم، شۇعىل كومەك، امبۋلاتورلىق ءدارى-دارمەكپەن قامتاماسىز ەتۋ، بارلىق ەمحانالىق كومەك جانە سالا ماماندارى، الەۋمەتتىك وسال توپتارعا ارنالعان قىمبات مەديتسينالىق كومەك، ستاتسيونارلىق، سوزىلمالى جانە جۇقپالى ناۋقاستارعا كورسەتىلەتىن كومەك قارجىسى مەملەكەت بيۋدجەتىنەن قاراستىرىلادى.
ودان بولەك، تاۋلىك بويى جۇمىس ىستەيتىن ستانتسيونارلىق ءبولىمنىڭ قابىلداۋى دا كەپىلدەندىرىلگەن تەگىن مەديتسينالىق كومەك پاكەتىنە كىرەدى.
سونداي-اق، مىندەتتى الەۋمەتتىك مەديتسينالىق ساقتاندىرۋ (م ءا م س) جۇيەسى بويىنشا ساقتاندىرىلعان ازاماتتار كەڭەيتىلگەن كەپىلدەمەگە يە بولاتىندىعى ايتىلعان.
«م ءا م س جۇيەسى بويىنشا ساقتاندىرىلعان ازاماتتار پروفيلاكتيكالىق تەكسەرۋ، جوسپارلى ستانتسيونارلىق كومەكتى ۇلعايتۋ، مەدبيكە كومەگى مەن قىمبات تۇراتىن كونسۋلتاتيۆتىك-دياگنوستيكالىق قىزمەتتى پايدالانا الادى»، - دەلىنگەن حابارلامادا.
ايتا كەتسەك، بۇگىندە ەلىمىزدە مىندەتتى الەۋمەتتىك مەديتسينالىق ساقتاندىرۋ جۇيەسى كەزەڭ-كەزەڭىمەن ەنگىزىلۋدە، كەلەر جىلدان باستاپ اتالعان جۇيە تولىعىمەن قولجەتىمدى بولادى.