ەلباسى «جىلقىنىڭ تاريحى» اتتى دەرەكتى فيلمدى تاماشالادى
قازاقستان پرەزيدەنتى «Equus: جىلقىنىڭ تاريحى» اتتى دەرەكتى تريلوگيانىڭ ەكىنشى ءبولىمىنىڭ تانىستىرىلۋ راسىمىنە باردى. فيلمدى رەجيسسەر، انتروپولوگ نايوبي تومپسون مەن قازاقستاندىق پروديۋسەر، زەرتتەۋشى نۇربول بايمۇحانوۆ جەتەكشىلىك ەتكەن كانادالىق ءتۇسىرۋ توبى وتاندىق سۋرەتشىلەردەن، ارتىستەردەن، كاسكادەرلەردەن، دۋبلەرلەر مەن بەزەندىرۋشىلەردەن قۇرالعان شىعارماشىلىق توپتى تارتا وتىرىپ، ەل اۋماعىندا تۇسىرگەن. وندا امەريكالىق كومپوزيتور داررەن فانگتىڭ مۋزىكاسى پايدالانىلدى.
دەرەكتى فيلمدە تىرشىلىگى جىلقىنىڭ قولعا ۇيرەتىلۋىنە بايلانىستى بولعان قازاقستان اۋماعىنداعى ەجەلگى مادەنيەتتەردىڭ كەزەڭدەرى عىلىمي زەرتتەۋ جۇمىستارى مەن زاماناۋي اقپاراتتىق تەحنولوگيا نەگىزىندە قايتا جاڭعىرتىلعان. بۇل ۇدەرىس ادامزات كوممۋنيكاتسياسىنا قاتىستى جاڭا جۇيەنىڭ قالىپتاسۋىن ايقىنداپ، كوشى- قوننىڭ جاندانۋىنا جانە ەجەلگى مەملەكەتتەردىڭ پايدا بولۋىنا جول اشتى.
دەرەكتى تريلوگيا 2019 -جىلعى ناۋرىزدا 50 ەلدىڭ، سونىڭ ىشىندە كانادا (CBC) ، ا ق ش- تىڭ (PBS) ، گەرمانيا (ZDF) ، فرانتسيا (ARTE) ، دانيا (DR) جانە قازاقستاننىڭ («Qazaqstan» ر ت ر ك) ۇلتتىق تەلەارنالارىندا كورسەتىلەدى دەپ جوسپارلانعان.
سونىمەن قاتار، نۇرسۇلتان نازاربايەۆ اقپارات جانە كوممۋنيكاتسيالار مينيسترلىگىنىڭ جاڭعىرتىلعان ورتالىق كوممۋنيكاتسيالار قىزمەتى ءباسپاسوز ورتالىعىنىڭ جۇمىسىمەن تانىستى. بۇل ورتالىق «قازمەديا ورتالىعى» تەحنولوگيالىق كەشەنىمەن تولىق بىرىكتىرىلگەن ءارى سوڭعى ۇلگىدەگى زاماناۋي قۇرالدارمەن جابدىقتالعان كوپ فۋنكتسيالى مەديا الاڭ سانالادى.
