ەلىمىزدەگى ەڭ جاس كوپ بالالى انا جازيرا تۇرعىنوۆا باسپانالى بولدى
وبلىستىق ىشكى ساياسات باسقارماسىنىڭ باسشىسى بەيسەن تاجىبايەۆ وسىنداي جاڭالىقتى الەۋمەتتىك پاراقشاسىنا جاريا ەتتى.
«كۇنى كەشە عانا ەلوردادا - ەلباسىنىڭ الدىندا اقتارىلا سويلەپ، ەل رازىلىعىنا بولەنگەن باتىر انانىڭ ءومىرى جاقسىلىققا كۇرت وزگەردى دەگەن وسى شىعار. ال استانادان - شىمكەنتكە پوەزبەن شىققان جازيرا، سول ساتتەن باستاپ اتىنىڭ شارتاراپتى شارلاپ كەتەرىن دە بىلگەن جوق. بەيسەنبىنىڭ تۇسىندە تەمىرجول ۆوكزالىندا انتالاي كۇتكەن تىلشىلەردەن تىكسىنىپ، توسىرقاپ جۇرگەنى دە سودان. ال بۇگىن، قاسيەتتى جۇمادا كيەلى تۇركىستاندا وبلىس باسشىسى جانسەيىت تۇيمەبايەۆتىڭ قولىنان باسپانانىڭ كىلتىن العان باتىر انا، ءوڭ مەن ءتۇستىڭ ورتاسىندا عاجايىپ كۇي كەشىپ تۇر» دەپ جازدى ول.
باسقارما باسشىسىنىڭ مالىمەتىنە قاراعاندا، ءتورت بولمەلى پاتەر لەنگەر قالاسىنان بەرىلگەن. ال وتاعاسى ولجاس ابىلدابەكوۆ ارنايى وقىتۋ كۋرستان ءوتىپ، جۇمىسقا ورنالاسادى.
«اينالدىرعان ءۇش كۇندە جازيرا تۇرعىنوۆاعا تاعدىردىڭ كەرەمەت سىيى تارتىلعانى انىق. جەتى بالانىڭ نەسىبەسىن، ادال جۇرەكتى انانىڭ تىلەۋىن ءتاڭىرى بەردى» دەپ جازىلعان ءسوز سوڭىندا.
ايتا كەتەيىك، بۇعان دەيىن قازاقپارات ءتىلشىسى ەلىمىزدەگى ەڭ جاس كوپ بالالى انا جازيرا تۇرعىنوۆا شىمكەنتتىڭ ىرگەسىندەگى جۇلدىز ەلدىمەكەنىندە پاتەر جالداپ تۇرىپ جاتقانى تۋرالى جازعان بولاتىن. جەتى بالانى تاربيەلەپ وتىرعان ەرلى- زايىپتىلاردىڭ تۇراقتى جۇمىستارى جوق ەكەنى دە جەتكىزىلگەن. سونىمەن قاتار، استاناداعى جاستار جىلىنىڭ اشىلۋ سالتاناتىندا جازيرا تۇرعىنوۆا ءوزى سياقتى جاستاردى كوپ بالالى بولۋدان قورىقپاۋعا شاقىردى.
اۆتور: اينۇر اقبايەۆا
