يزرايل نەدەن قاۋىپتەنىپ وتىر؟

رەسمي تەل- اۆيۆ وزىمەن شەكارالاس ەلدە يران ىقپالىنىڭ كۇشەيۋىنە جول بەرمەس ءۇشىن جان- جاقتى شارالار قابىلداۋعا دايىن.

حەرمون شاڭعى شيپاجايى جۇمىسىن قايتا باستادى. بۇل -  زىمىرانعا قارسى قورعانىس جۇيەسىمەن جابدىقتالعان الەمدەگى جالعىز شيپاجاي. ءدال وسى جۇيە قاڭتاردىڭ 20 - كۇنى سيريادان ۇشقان راكەتانى قاعىپ ءتۇسىردى. ەلدىڭ بارلاۋ قىزمەتىنىڭ مالىمەتىنشە، بۇل شابۋىلدى سيريا اۋماعىنان يران اسكەرى جاساعان. يزرايل دە كوپ كۇتتىرمەي جاۋاپ قايتاردى. ءتۇنى بويى اسكەري ۇشاقتار سيرياداعى بىرنەشە نىسانعا وق جاۋدىرعان.

 رەۋۆەن ريۆلين، يزرايل پرەزيدەنتى:

 -  بۇل ءبىزدىڭ سيريا اۋماعىنان يران كۇشتەرى جاساعان زىمىران شابۋىلىنا قاتاڭ جاۋابىمىز بولعان. وسى ارەكەت سيريادا يران ىقپالىنىڭ كۇشەيۋىنىڭ دالەلى جانە بۇعان كونەتىن نيەتىمىز جوق.

 دونالد ترامپ سيريادان اقش اسكەرىن شىعاراتىنىن جاريالاعاننان كەيىن، ساراپشىلار بۇل ەلدە يراننىڭ بەلسەندىلىگى ارتقان دەپ وتىر. رەسمي تەل- اۆيۆ مۇنى ەلىنە تونگەن قاۋىپ دەپ ساناپ، تەگەراننىڭ يزرايلگە ۇنەمى سەس كورسەتىپ جۇرگەنىن ەسكە سالدى.

ۆلاديمير مەسامەد، يەرۋساليم ۋنيۆەرسيتەتىنىڭ يران تانۋشى مامانى:

 -  وسىدان ءبىر اپتا بۇرىن، يسلام ريەۆوليۋتسيا ساقشىلارى كورپۋسىنىڭ باس قولباسشىسى گەنەرال دجافاري يزرايلگە قارسى زىمىران شابۋىلىن جاساۋ ءۇشىن تەك قولايلى ءساتتى كۇتىپ وتىرمىز دەپ مالىمدەگەن بولاتىن. كەزىندە يران مەن يزرايلدىڭ قاتىناسى قالىپتى بولعان. يسلام ريەۆوليۋتسياسىنا كەيىن جاعداي كۇرت وزگەردى. سوڭعى 40 جىل بويى قوس تاراپ ءبىر بىرىنە سەس كورسەتسە دە، وسى ۋاقىتقا دەيىن تىكەلەي قاقتىعىسقا بارماعان. قازىر ەكى ەل اشىق تۇردە سوعىس جاريالاۋعا جاقىن تۇر دەۋگە دە بولادى.

www.24.kz