تۇركىستانداعى قۇرىلىس جۇمىستارىنا جەرگىلىكتى جاستار تارتىلادى

ولار ايتۋلى جىل اۋقىمىندا قولعا الىناتىن جاڭا جوبالاردى جۇزەگە اسىرماق، دەپ حابارلايدى قازاقپارات ءتىلشىسى.

بۇگىندە تۇركىستان وبلىسىندا جاستاردىڭ سانى 501 مىڭنان اسادى. ونىڭ ىشىندە قالا جاستارى 86 مىڭ بولسا، اۋىل جاستارى 415 مىڭعا جۋىقتايدى. وڭىردە 2 جوعارى جانە 66 ورتا ارناۋلى وقۋ ورنىندا 57 مىڭنان اسا ستۋدەنت ءبىلىم الادى.

«سەرپىن-2050» باعدارلاماسىمەن 9313 جاس قامتىلىپ، 2018-جىلى اتالعان باعدارلاما اياسىندا 440 جاس وقۋىن ءبىتىردى. ماماندىق العان جاستاردىڭ 63,3 پايىزى تۇراقتى جۇمىسقا ورنالاستى. سونداي-اق، «جاسىل ەل» باعدارلاماسى بويىنشا جىل سايىن 1275 جاس ەڭبەكپەن قامتىلۋدا. «ديپلوممەن اۋىلعا» جوباسى اياسىندا 913 جاس مامان تۇراقتى جۇمىس تاۋىپ، 314 مامان باسپانالى بولدى.

ەلباسى جارلىعىنا سايكەس جاستارعا الەۋمەتتىك قولداۋ ماسقاتىندا بيىلعى جىلى اۋدان، قالالارداعى 500 دەن استام جۇمىسسىز ازاماتتى تۇركىستان قالاسىندا سالىنىپ جاتقان قۇرىلىس جۇمىستارىنا تارتۋ كوزدەلگەن. ولاردىڭ قاتارىنان «تۇركىستان جاستار قۇرىلىس جاساعى» قۇرىلىپ، مەردىگەر كومپانيالارىمەن كەلىسسوزدەر جۇرگىزىلۋدە.

ايتا كەتەيىك، جاستار جىلىنا وراي ناۋرىز ايىنان باستاپ جىل سوڭىنا دەيىن «اۋدان جاستارىنىڭ تۇركىستانعا تارتۋى» اتتى اپتالىعى ۇيىمداستىرىلىپ، 1000 نان استام مادەني-سپورتتىق ءىس-شارالار ۇيىمداستىرىلماق.

سونىمەن قاتار، بيىل «تۇركى جاستارىنىڭ كونگرەسىن» جانە «ورتا ازيا جاستارىنىڭ فورۋمىن» وتكىزۋ كوزدەلىپ وتىر.