قىزداردى ءوزىن-ءوزى قورعاي بىلۋگە ۇيرەتۋ كەرەك - مەملەكەت باسشىسى
پرەزيدەنت نۇرسۇلتان نازاربايەۆ اتالعان ماسەلەنى قولدايتىنىن جەتكىزدى، دەپ حابارلايدى قازاقپارات ءتىلشىسى.
مىنبەرگە دجيۋ-دجيتسۋدەن الەم چەمپيونى ءمولدىر مەكەنبايەۆا شىعىپ، سپورت سالاسىنداعى تاجىريبەسى جانە وسى سالادا اتقارىپ جاتقان جۇمىستارى تۋرالى ايتىپ بەردى.
«بۇگىندە مەن نازاربايەۆ ۋنيۆەرسيتەتىندە ءبىلىم الىپ ءجۇرمىن. كومپيۋتەرلىك تەحنولوگيا مەن ماتەماتيكا بويىنشا ءۇشىنشى كۋرستا وقيمىن. دجيۋ-دجيتسۋدان حالىقارالىق دارەجەدەگى سپورت شەبەرىمىن. تاتاميگە شىققان سايىن ەلىمدى بارلىق الەم تانىسا ەكەن دەپ ارماندايمىن. ەجەلگى ۋاقىتتا ۇلى دالانىڭ ايەلدەرى باتىل ءارى قايسار مىنەزدى بولدى. ساقتاردىڭ پاتشايىمى - توميريس ماسساگەتتەردى باسقارىپ، ءوز جەرىن، ءوز ەلىن قورعاي ءبىلدى. فاشيزمگە قارسى سوعىستا ءاليا مولداعۇلوۆا مەن مانشۇك مامەتوۆا كوزگە ءتۇستى. مەن نازاربايەۆ ۋنيۆەرسيتەتىندە العاش رەت ارنايى كلۋب اشتىم. سول جەردە وتكەن جىلدان باستاپ قىزداردى ءوزىن-ءوزى قورعاي بىلۋگە، دجيۋ-دجيتسۋ مەن گرەپپلينگكە تەگىن ۇيرەتىپ ءجۇرمىن»، - دەدى ءمولدىر مەكەنبايەۆا.
وسى كەزدە پرەزيدەنت نۇرسۇلتان نازاربايەۆ ميكروفونىن قوسىپ: «قىزداردى ءوزىن-ءوزى قورعاي بىلۋگە ۇيرەتكەن اسا ماڭىزدى»، - دەپ ءوز ويىن جەتكىزدى.
ايتا كەتەيىك، ەلورداداعى «نۇر الەم» پاۆيلونىندا ەلباسى نۇرسۇلتان نازاربايەۆتىڭ قاتىسۋىمەن «تاۋەلسىزدىك ۇرپاقتارى» اتتى جاستار جىلىنىڭ سالتاناتتى اشىلۋ ءراسىمى ءوتىپ جاتىر.
ق ر پرەزيدەنتى نۇرسۇلتان نازاربايەۆ قازاقستان حالقىنا جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن. پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان ەدى.
ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.