تيتاننىڭ سولتۇستىگىنە جاۋىن ءتۇستى
بۇل ساتۋرننىڭ سەرىگىنە جازعى ماۋسىمنىڭ كەلگەنىن جانە سول جاق بولىگىندە جاڭبىر جاۋاتىنىن دالدەيدى. جەر پلانەتاسىنان باسقا تەك تيتاندا عانا جاڭبىر سەرىكتىڭ بەتكى قاباتىمەن ارەكەتتەسەتىنى بەلگىلى. زەرتتەۋدى Geophysical Research Letters جۋرنالى جاريالاعان. ساتۋرننىڭ سەرىگى تيتان - كۇن جۇيەسىندەگى ەكىنشى ءىرى جانە بەتىندە سۇيىقتىق زاتى بار سەرىك ەكەنى بەلگىلى. نەگىزىنەن بۇلار مەتان- ەتاندى كولدەر مەن وزەندەر، سول سەبەپتى جاڭبىر دا مەتاننان تۇرادى. تيتانداعى ءبىر تاۋلىك جەردەگى 15,9 كۇنگە تەڭ بولسا، ءبىزدىڭ 29 جىل جانە 5 ايىمىز تيتانداعى 1 جىلمەن بىردەي. سول سەبەپتى ماۋسىمنىڭ ۇزاقتىلىعى جەتى جارىم جىلعا جالعاسادى.
2009 -جىلى تيتاندا كوكتەمگى كۇن مەن ءتۇننىڭ تەڭەلۋ بولعان ەدى. ال 2011 -جىلى وڭتۇستىك بولىگىنە قىس تۇسسە، سولتۇستىگىندە عالىمدار كۇتكەن جاڭبىر جاۋعان جوق. سول ۋاقىتتان بەرى عالىمدار ساتۋرن سەرىگىنىڭ سولتۇستىك بولىگىن زەرتتەپ كەلەدى. بۇگىنگە دەيىن ەشقانداي وزگەرىستەر بايقالماعان. الايدا ايداحو ۋنيۆەرسيتەتىنىڭ عالىمدارى 2016 -جىلى تۇسىرىلگەن Cassini سۋرەتتەرىنەن 120 مىڭ شارشى شاقىرىمعا سوزىلعان جارىق ايماقتى انىقتاعان. سۋرەتتەر 2016 -جىلى 7 - شىلدەدە تۇسىرىلگەن ەكەن. بۇعان دەيىن عالىمدار تيتاندا العاش رەت شاڭدى داۋىلدى بايقاعان بولاتىن.
ايبار رىسداۋلەت
Massaget.kz