ترامپ زىمىرانعا قارسى قورعانىس جۇيەسىنىڭ جاڭا ستراتەگياسىن تانىستىردى

 استانا. قازاقپارات - پرەزيدەنت دونالد ترامپ جاريالاعان ا ق ش- تىڭ زىمىرانعا قارسى قورعانىس جۇيەسىنىڭ جاڭا ستراتەگياسىندا سولتۇستىك كورەيانىڭ قاۋىپ ءتوندىرىپ وتىرعانى، ال رەسەي، يران مەن قىتايدىڭ اسكەري قۋاتىن كۇشەيتىپ جاتقانى ايتىلعان.

ا ق ش پرەزيدەنتى دونالد ترامپ قاڭتاردىڭ 17 ءى كۇنى پەنتاگوندا ەلدىڭ زىمىرانعا قارسى قورعانىس جۇيەسىنىڭ جاڭا ستراتەگياسىن تانىستىردى. جاڭا ستراتەگيا ەلدىڭ زىمىرانعا قارسى قورعانىس مۇمكىندىكتەرىن كەڭەيتۋدى كوزدەيدى. اتاپ ايتقاندا، عارىشتا زىمىران شابۋىلىن ەرتەرەك حابارلايتىن سپۋتنيكتەردىڭ جاڭا بۋىنىن ورنالاستىرۋدى ۇسىنادى.

ا ق ش قورعانىس ءمينيسترى مىندەتىن اتقارۋشى پاتريك شەناحەن جاريالاعان قۇجاتتا ا ق ش حالىقارالىق نورمالاردى مويىندامايتىن ەلدەرگە قارسى زىمىرانعا قارسى قورعانىس جۇيەسىن جاساۋدا ءوزىن شەكتەمەيدى دەپ جازىلعان. ەسەپتە سولتۇستىك كورەيا ا ق ش- قا «قاۋىپ توندىرەتىن» ەل رەتىندە اتالعان. سونىمەن بىرگە ا ق ش- تىڭ باسەكەلەستەرى - قىتاي مەن رەسەيدىڭ اسكەري قۋاتىن كۇشەيتىپ جاتقانى باياندالعان.

«باسەكەلەستەر! سىزدەردىڭ نە ىستەپ جاتقاندارىڭىزدى بايقاپ وتىرمىز جانە ءتيىستى شارا قابىلدايمىز» دەدى پاتريك شەناحەن.

ترامپ تا، شولۋ اۆتورلارى دا ا ق ش- تى اسكەري قاۋىپ-قاتەردەن قورعاۋ ءۇشىن زىمىرانداردى تەز بايقاپ، قاداعالاۋ جانە جويۋعا مۇمكىندىك بەرەتىن عارىش تەحنولوگياسىن بەلسەندى قولدانۋ قاجەت دەگەن ورتاق قورىتىندى جاساعان. قارسىلاستىڭ زىمىراندارىنا اۋەگە كوتەرىلگەن ساتتە بىردەن سوققى بەرىلۋى ءتيىس دەپ كورسەتىلگەن.

قاۋىپتى ەرتە بايقاۋ تۇجىرىمداماسىن ىسكە اسىرۋ ءۇشىن ترامپ قارسىلاستىڭ زىمىراندارىن جەر وربيتاسىنا ورنالاستىرىلاتىن عارىش سپۋتنيكتەرىنىڭ كومەگىمەن قاداعالاي باستاۋدى ۇسىنادى. مىسالى، الگىندەي عارىش سپۋتنيكتەرى جەلىسى قازىرگى زامانعى گيپەردىبىستى نەمەسە لازەرلىك قارۋ تۇرلەرىنە قارسى تۇرۋعا مۇمكىندىك بەرەدى (2018-جىلى ناۋرىزدا رەسەي پرەزيدەنتى ۆلاديمير پۋتين رەسەيدە ونداي قارۋ-جاراق بار دەپ مالىمدەگەن.)

سونىمەن بىرگە درونداردى لازەرلىك قارۋمەن جاراقتاندىرۋ جوسپارلانعان.

بۇعان قوسا ترامپ ا ق ش الياسكادا زىمىرانعا توسقاۋىل جاسايتىن 20 «جاڭا» قوندىرعى ورناتادى دەپ ۋادە بەردى. الياسكادا بۇرىننان بار قوندىرعىلاردى وسىلارمەن الماستىرا ما، الدە سولارعا قوسىمشا ورنالاستىرىلادى ما - پرەزيدەنت ونى تۇسىندىرگەن جوق. ا ق ش قازىر الياسكادا اۋە شابۋىلىنان قورعايتىن 44 قوندىرعى ۇستاپ وتىر.

«ءبىز امەريكالىقتاردى زىمىران شابۋىلىنىڭ بارلىق تۇرىنەن، سونىڭ ىشىندە قاناتتى جانە گيپەردىبىستى زىمىرانداردان دا قورعايمىز» دەپ ۋادە بەردى ا ق ش پرەزيدەنتى.

پرەزيدەنت ترامپ 2018-جىلى ماۋسىمدا اشىق عارىش كەڭىستىگىندە ا ق ش مۇددەسىن قورعايتىن قارۋلى كۇش (Space Force) قۇرىلاتىنى تۋرالى جاريالاعان. وعان دەيىن ا ق ش- تا 1947-جىلى اسكەري-اۋە كۇشتەرى (Air Force) پايدا بولعالى بەرى قارۋلى كۇشتەردىڭ جاڭا ءتۇرى قۇرىلماعان. عارىش اسكەرى 2020-جىلعا قاراي قۇرىلادى دەپ جوسپارلانعان.

ترامپتىڭ بۇل بايانداماسى 2017-جىلى جەلتوقساندا ءوزى جاريا ەتكەن ۇلتتىق قاۋىپسىزدىك ستراتەگياسىنىڭ جالعاسى سانالادى. وندا پرەزيدەنت زىمىران شابۋىلىنان قورعانۋدى كۇشەيتۋ - پەنتاگوننىڭ باسىم باعىتى دەپ كورسەتكەن. ستراتەگيادا ا ق ش- تىڭ «باسەكەلەستەرى» رەتىندە «ءوز اسكەري قۋاتىن كۇشەيتىپ جاتقان» قىتاي مەن رەسەي اتالعان. وتكەن جىلى رەسەي قارۋلى كۇشتەرىنىڭ جەتىستىكتەرى تۋرالى پرەزيدەنت پۋتيننىڭ مالىمدەمەسىنە پەنتاگون «ءبىز تولىق ءازىرمىز» دەپ قىسقا جاۋاپ قايتارعان.

«ازاتتىق»