پاۆلودار وبلىسىندا تۋۋ كورسەتكىشى ازايدى: بولات باقاۋوۆ ماسەلەنى زەرتتەۋدى تاپسىردى

«بىزدە جاڭا تۋعان بالالاردىڭ سانى نەلىكتەن ازايىپ جاتقانىن زەرتتەۋىمىز كەرەك. وڭىردە كوپتەگەن اۋرۋلار بويىنشا، ونىڭ ىشىندە ونكولوگيالىق اۋرۋلارعا قاتىستى جاعداي نەلىكتەن كۇردەلى؟ وسى ورايدا ەكولوگيالىق احۋالعا كىنا تاعا بەرمەۋىمىز كەرەك. سوندىقتان وسى ايتىلعان كۇردەلى ماسەلەلەردى بىرلەسە شەشىپ، ناقتى ناتيجەنى كوزدەۋىمىز قاجەت»، - دەدى بولات باقاۋوۆ.

ايماق باسشىسى 2019-جىلى حالىق قالاۋلىلارى ءوڭىردىڭ تىنىس-تىرشىلىگىن ءجىتى نازاردا ۇستاۋى قاجەتتىگىن اتاپ ءوتىپ، تۇرعىندار الاڭداۋشىلىق بىلدىرگەن ماسەلەلەردى بىرلەسە شەشۋگە شاقىردى.

«وبلىس بويىنشا شاعىن جانە ورتا كاسىپكەرلىك سۋبەكتىلەرىنىڭ سانى ازايۋدا. بارلىق باسقارمالارعا بيزنەستى قولداۋدى تاپسىرۋدامىز. بۇل جەردە «اتامەكەننىڭ» دە قوسار ۇلەسى زور بولۋى كەرەك»، - دەدى ول.

وتىرىس بارىسىندا «رومات» فارماتسيەۆتيكالىق كومپانياسىنا قاتىستى ماسەلە دە نازاردان تىس قالمادى.

«كەزىندە قازاقستاننىڭ 50 پايىز نارىعىن ءدارى-دارمەكپەن قامتاماسىز ەتكەن كومپانيانىڭ جاعدايى نە بولعانىن بىلەسىزدەر. ماسەلەلەردى ءوتىپ كەتكەننەن كەيىن ەمەس، ولاردىڭ الدىن-الىپ ۋاقتىلى شەشۋگە تىرىسۋ كەرەك. وسى ورايدا، بارلىقتارىڭىزدى بەلسەندىلىككە شاقىرامىن»، - دەپ اتاپ ءوتتى بولات باقاۋوۆ.

ەستەرىڭىزگە سالا كەتەيىك، پاۆلودار وبلىسىندا سوڭعى 10 جىلدا اۋىل تۇرعىندارىنىڭ سانى 34 مىڭعا ازايدى. قازىرگى كەزدە اۋىلدا تۇراتىن پاۆلودارلىقتاردىڭ ۇلەسى نەبارى %30 قۇرايدى.