فرانسيا حالقىنىڭ تەڭ جارتىسى جالدامالى پاتەردە تۇرادى

 ەلدىڭ ۇلتتىق ستاتيستيكا ۇيىمىنىڭ مالىمەتى وسىنداي. ءتىپتى مامانداردىڭ پىكىرىنشە، پاتەردى جالعا بەرۋ نارىعى ودان ءارى دامىپ كەلەدى. ەلدى مەكەندەردەگى تۇرعىندار جاپپاي ءىرى شاھارلارعا قونىس اۋدارسا دا، ولاردىڭ كوبى پاتەر ساتىپ الۋعا دا اسىقپايتىن كورىنەدى.

 فرانسيا استاناسى پاريجدە جىلجىمايتىن مۇلىكتىڭ ءبىر شارشى مەترى - 10 مىڭ ەۋرو تۇرادى. مۇنداي باعانى كوپشىلىكتىڭ قالتاسى كوتەرمەيدى. سول سەبەپتى جالدامالى پاتەرگە سۇرانىس كوپ. ونىڭ ۇستىنە جەرگىلىكتى زاڭ بويىنشا جالعا تۇرۋشىلاردى پاتەردەن شىعارىپ جىبەرۋ دە وڭاي ءىس ەمەس. سوندىقتان بۇل قاراپايىم حالىق ءۇشىن وتە ىڭعايلى.

مارين كلات، جىلجىمايتىن مۇلىك اگەنتتىگىنىڭ باسقارۋشىسى:

 - ارينە، ءار ادام ءوزىمنىڭ ءۇيىم بولسا دەپ ارماندايدى. وعان قوسا، ەل ارالاپ دەمالىپ، ءومىردىڭ راحاتىن دا كورگىسى كەلەدى. الايدا جەكە باسپانا ءۇشىن وسىنىڭ بارىنەن باس تارتۋ مۇمكىن ەمەس.

جالپى فرانسيا بويىنشا 35 ميلليون باسپانا بار. ستاتيستيكا بويىنشا جىل سايىن ونىڭ 1 ميلليونى عانا ساتىلادى.

 مارين كلات، جىلجىمايتىن مۇلىك اگەنتتىگىنىڭ باسقارۋشىسى:

 - بۇگىندە پاريجدە پاتەر ساتىپ الۋ ءۇشىن ءبىر شارشى مەترگە 10-13 مىڭ ەۋرو تولەۋ كەرەك. جالداۋ ءۇشىن 15 شارشى مەترلىك پاتەرگە ايىنا 600 ەۋرو جۇمسالادى. ال 90 شارشى مەتر 3 بولمەلى پاتەر قۇنى 2 مىڭ ەۋروعا دەيىن جەتەدى.

 فرانسيا بيلىگى «باسپانانى جالعا بەرۋشىلەردى ۇلتتىق ەكونوميكانىڭ دامۋىنا ۇلەس قوساتىنداردىڭ قاتارىندا» دەيدى. ايتۋىنشا، شاعىن بيزنەستى دوڭگەلەتىپ وتىرعاندار ءوز ينۆەستيتسياسىمەن الەۋمەتتىك ماسەلەنى شەشەدى. جىلجىمايتىن مۇلىكتىڭ قۇنى نارىققا بايلانىستى ءوسىپ وتىرادى. سوڭعى 10 جىلدا ول ەكى ەسەگە قىمباتتاعان. ال جالدامالى پاتەردىڭ باعاسى زاڭمەن قاتاڭ قاداعالانىپ، جىلىنا 3 پايىزدان ارتپايدى.

www.24.kz