قازاقستاندا سالىق تولەۋشىلەردى ساناتقا ءبولۋ ەنگىزىلەدى

سالىق تولەۋشىلەردە تاۋەكەلدەردى باعالاۋ جۇيەسىن (ت ب ج) قولدانۋعا قاتىستى، سونداي-اق ت ب ج جۇرگىزۋ بارىسىندا ەسكەرىلەتىن ساناتتار بويىنشا سۇراقتار ءجيى تۋىندايدى.

باسپا ءسوز قىزمەتىنىڭ مالىمەتىنشە، سالىق كودەكسىنىڭ 137-بابىنا سايكەس سالىق ورگاندارى سالىق تولەۋشىلەر (سالىق اگەنتتەرى) ۇسىنعان سالىقتىق ەسەپتىلىكتىڭ دەرەكتەرىنە، ۋاكىلەتتى مەملەكەتتىك ورگانداردان، جەرگىلىكتى اتقارۋشى ورگانداردان، ۋاكىلەتتى ورگانداردان العان مالىمەتتەرگە، سونداي-اق سالىق تولەۋشىنىڭ (سالىق اگەنتىنىڭ) قىزمەتى تۋرالى باسقا دا قۇجاتتارعا جانە (نەمەسە) مالىمەتتەرگە تالداۋدى جۇزەگە اسىرادى.

«وسىنداي تالداۋدىڭ ناتيجەلەرى نەگىزىندە 2019-جىلعى 1- قاڭتاردان باستاپ بارلىق سالىق تولەۋشىلەردى (سالىق اگەنتتەرىن) ساناتتاۋ ولاردىڭ قىزمەتىن تاۋەكەل دارەجەسىنىڭ تومەن، ورتاشا نەمەسە جوعارى ساناتىنا جاتقىزۋ جانە سالىقتىق اكىمشىلەندىرۋدىڭ سارالاپ قولدانۋ شارالارىن قولدانۋ جولىمەن جۇزەگە اسىرىلادى»، - دەلىنگەن حابارلامادا.

سالىق كودەكسى 137-بابىنىڭ 1-تارماعىندا كورسەتىلگەن ولشەمشارتتاردان باسقا تاۋەكەل دارەجەسىنىڭ ولشەمشارتتارى قۇپيا اقپارات بولىپ تابىلادى. قۇپيا اقپارات بولىپ تابىلمايتىن ولشەمشارتتار بويىنشا تاۋەكەلدەردى باسقارۋ جۇيەسىن قولدانۋ ءتارتىبى ق ر قارجى ءمينيسترىنىڭ 2018-جىلعى 20- اقپانداعى  252№ بۇيرىعىمەن بەكىتىلدى.

وسىلاي، قاعيداعا سايكەس، تاۋەكەلدەردى باسقارۋ جۇيەسىنىڭ ناتيجەلەرى بويىنشا سالىق تولەۋشىنىڭ قانداي تاۋەكەل دارەجەسىنە جاتقىزىلعاندىعى تۋرالى اقپارات جىلىنا ەكى رەت انىقتالاتىن بولادى جانە 2019-جىلدىڭ 1-قاڭتارىنان باستاپ سالىق تولەۋشىلەرگە «سالىق تولەۋشىنىڭ كابينەتى» ۆەب- قوسىمشاسىنا جىبەرىلەدى، ال 2019-جىلدىڭ 1-شىلدەسىنەن باستاپ اتالعان اقپارات مەملەكەتتىك كىرىستەر كوميتەتىنىڭ سايتىندا جاريالاناتىن بولادى.

سونىمەن بىرگە، تاۋەكەل دارەجەسىمەن قوسا، تاۋەكەلدەردى باسقارۋ جۇيەسىندە قولدانىلاتىن قۇپيا اقپارات بولىپ تابىلمايتىن ولشەمشارتتاردىڭ ەسەپتەلۋى تۋرالى مالىمەتتەر سالىق تولەۋشىلەرگە «سالىق تولەۋشىنىڭ كابينەتى» ۆەب- قوسىمشاسىنا جىبەرىلەدى.

ەگەر قاجەت بولسا، سالىق تولەۋشىلەر «سالىق تولەۋشىنىڭ كابينەتى» ۆەب- قوسىمشاسى ارقىلى مەملەكەتتىك كىرىستەر ورگاندارىنا كورسەتىلگەن ولشەم شارتتار بويىنشا جىبەرە الادى (كامەرالدىق باقىلاۋ ناتيجەلەرى بويىنشا انىقتالعان بۇزۋشىلىقتار تۋرالى حابارلامالار بويىنشا تۇسىنىكتەمەلەر الۋ جانە ءتۇسىندىرۋدى پىسىقتاۋعا ۇقساس).