اقتاۋدا جەر كەزەگىندە تۇرعاندارعا ءۇي سالىنىپ بەرىلمەك

ماڭعىستاۋ وبلىستىق جەر قاتىناستارى باسقارماسىنىڭ باسشىسى ەسەمۇرات دۇزماعانبەتوۆتىڭ ايتۋى بويىنشا اقتاۋ قالاسىنان جەر الۋعا كەزەكتە تۇرعان 70 مىڭنان استام تۇرعىن ءۇشىن «نۇرلى جەر» باعدارلاماسى اياسىندا اقشۇقىر، سايىن اۋىلدارىنىڭ شىعىس بەتىنەن تيپتىك جوباداعى ۇيلەر سالىنىپ ۇسىنىلاتىن بولادى.

اقتاۋ قالاسىنىڭ باس جوسپارىندا جەكە تۇرعىن ءۇي سالۋ ءۇشىن جەر تەلىمى قارالماعاندىقتان بۇل ماسەلە وسىلاي شەشىلمەكشى. تۇرعىندارعا ۇسىنىلاتىن ۇيلەردىڭ شارشى مەترى 120 مىڭ تەڭگەگە باعالانادى.

جالپى ماڭعىستاۋ وبلىسىنىڭ جەر كولەمى 16564,2 مىڭ گەكتار. ونىڭ ىشىندە اۋىل شارۋاشىلىعى ماقساتىنداعى جەرلەر - 5228,0 مىڭ گەكتار، ەلدى مەكەن جەرلەرى 1098,0 مىڭ گەكتار، ءوندىرىس، كولىك، بايلانىس، قورعانىس جانە اۋىل شارۋاشىلىعى ماقساتىنان باسقا جەرلەر - 245,4 مىڭ گەكتار، ەرەكشە قورعالاتىن تابيعي اۋماقتار جانە ەمدەۋ-ساۋىقتىرۋ ماقساتىنداعى جەرلەر - 223,4 مىڭ گەكتار، ورمان قورى جەرلەرى - 253,2 مىڭ گەكتار، بوسالقى جەر - 9501,9 مىڭ گەكتاردى قۇرايدى.